नवचैतन्य टाईम्स माजलगाव प्रतिनिधी(सुग्रीव कदम)-पंकजा मुंडे हरल्या तर आत्महत्या करेन असं सांगणाऱ्या एका कार्यकर्त्याचा खरंच अपघाती मृत्यू झाल्याची धक्कादायक घटना घडली आहे. लातुरात ही घटना घडली. लातूर जिल्ह्यातील एस आर या गावातील सचिन मुंडे या कार्यकर्त्याने पंकजा मुंडे निवडून आल्या नाही तर मी आत्महत्या करेन, असं सांगितलं होतं. या संबंधिचा व्हिडिओ २६ मे राजी त्याने टाकला होता. त्याचा व्हिडिओ सोशल मीडियावरती तुफान व्हायरल झाला होता. मात्र, काल रात्री त्याचा अपघाती मृत्यू झाल्याने जिल्ह्यात उलट सुलट चर्चांना उधाण आले आहे.
लोकसभा निवडणुकीचा निकाल लागण्यापूर्वी सचिनने एक व्हिडिओ पोस्ट केला होता. पंकजा मुंडे यांचा पराभव झाला तर मी आत्महत्या करेन, अशा स्वरूपाचा हा व्हिडिओ सोशल मीडियावर व्हायरल होत होता. बीड लोकसभा निवडणुकीचा निकाल लागला आणि पंकजा मुंडे यांचा पराभव झाला. त्यानंतर काही ठिकाणी संताप व्यक्त करण्यात आला. दोन दिवसानंतर वातावरण निवळले आहे. पंकजा मुंडे यांनीही कार्यकर्त्यांना आवाहन करत शांत केलं होतं. मात्र, काल एक घटना घडली आणि पुन्हा उलट सुलट चर्चेला उधाण आलं आहे.
काय आहे घटना ?
सचिन कोंडीबा मुंडे ही व्यक्ती लातूर जिल्ह्यातील अहमदपूर तालुक्यात असणाऱ्या यस्तर या गावची रहिवासी आहे. व्यवसायाने ट्रॅक्टर चालक असलेल्या सचिनचा लोकसभेचा निकाल लागण्यापूर्वी एक व्हिडिओ व्हायरल झाला होता. पंकजा मुंडे विजय नाही झाल्या तर सचिन गेला, अशा स्वरूपाचा तो व्हिडिओ होता. काल रात्री साडेआठ नंतर सचिनचा मृतदेह बोरगाव पाटीजवळ आढळून आल्याने गावात एकच खळबळ माजली आहे.
बोरगाव फाटी जवळ काय झालं?
अहमदपूर येथून येलदरवाडी या ठिकाणी मुक्कामाला जाणारी एसटी महामंडळाची बस नित्य नियमाने निघाली होती. बोरगाव पाटीजवळ असणाऱ्या वळणाला बसच्या चालकाला रस्त्यावर पडलेला इसम दिसला. बस चालकाने गाडी वळवली, समोरच्या चाकापासून संरक्षण करता आलं, मात्र मागील चाक हे सचिन मुंडेच्या अंगावरून गेलं. या घटनेत सचिन मुंडे याचा जागेवरच मृत्यू झाला.
याबाबतची माहिती किनगाव पोलिसांना देण्यात आली. किनगाव पोलीस घटनास्थळी दाखल झाले. मृतदेह उत्तरीय तपासणीसाठी दवाखान्यात पाठवून देण्यात आला आहे. पोलीस पुढील तपास करत आहोत.
पोलीस आणि एस टी महामंडळाचा वाहनचालक यांच्या माहितीनुसार हा अपघात आहे. मात्र, सचिन मुंडे यांनी काही दिवसांपूर्वी केलेला व्हिडिओ आणि आजची घटना याची सांगड घालून पंकजा मुंडेसाठी सचिन मुंडेने आत्महत्या केल्याची माहिती सोशल मीडियावर व्हायरल होत आहे. नेमकं सत्य काय याबाबत आता उलट सुलट चर्चा होत आहे.
