नवचैतन्य टाईम्स गडचिरोली (प्रतिनिधी)- कोट्यावधी रुपयांच्या मालमत्तेवर डोळा ठेवून ती हडपण्यासाठी गडचिरोलीत कार्यरत असलेल्या एका महिला अधिकाऱ्याने हत्येचा कट रचल्याचा धक्कादायक प्रकार उघडकीस आला आहे. तिने स्वत:च्या सासऱ्याच्या हत्येची सुपारी दिली होती. अर्चना पुट्टेवार (रा.मानेवाडा, नागपूर) असे महिला अधिकाऱ्याचे नाव आहे. त्या गडचिरोलीत नगर रचना विभागात सहाय्यक संचालक म्हणून कार्यरत आहेत. सुरूवातीला अपघात वाटणाऱ्या या प्रकरणाला दोन आठवड्यानंतर वाचा फुटली आणि सुपारी देऊन हत्या केल्याचे उघड झाले. या प्रकरणात महिला अधिकारी अर्चना पुट्टेवार हिच्यासह तीन आरोपींना बेड्या ठोकण्यात आल्या आहेत.
अर्चना पुट्टेवार हिचे सासरे पुरूषोत्तम पुट्टेवार (८२ वर्ष) रा.शुभनगर (मानेवाडा, नागपूर) यांचा गेल्या २२ मे रोजी मानेवाडा चौकाजवळ कारच्या धडकेत मृत्यू झाला. त्यांच्या पत्नीचे ऑपरेशन झाले होते. त्यामुळे दवाखान्यातून ते मुलीच्या घरी जात असताना एका कारने त्यांना धडक दिली. दरम्यान पुरूषोत्तम पुट्टेवार यांच्या चुलत भावाने वरिष्ठ पोलिस अधिकाऱ्यांची भेट घेऊन त्यांची हत्या झाल्याची भिती व्यक्त केली. नागपूरचे पोलिस आयुक्त डॅा.रविंद्रकुमार सिंगल यांनी गुन्हे शाखेला त्यादृष्टीने तपास करण्याचे निर्देश दिले. नागपूर शहर पोलिसांच्या युनिट-४ ने केलेल्या चौकशीत घरातील कार चालक सार्थक बागडे याची भूमिका संशयास्पद आढळून आली. चौकशीत सचिन धार्मिक आणि नीरज निमजे यांची नावे समोर आली. पोलिसी खाक्या दाखविल्यानंतर सार्थक बागडे याच्या सांगण्यावरून नीरजने पुट्टेवार यांची हत्या केल्याचे सांगितले. यासोबतच सार्थकला बोलते केल्यानंतर त्याने अर्चना पुट्टेवार यांच्या सांगण्यावरून हा हत्येचा कट रचल्याचे कबूल केले.
असा रचला हत्येचा कट
गडचिरोलीत नोकरी करत असलेल्या पण मूळच्या नागपूर येथील असलेल्या अर्चना पुट्टेवारला ड्रायव्हरची आवश्यकता होती. तिची ओळख सचिन धार्मिक याच्यासोबत झाली. सचिनचे वडील चालवत असलेल्या भिसीची ती सदस्य होती. सचिनने त्याचा मित्र सार्थक बागडे याचे ड्रायव्हर म्हणून नाव सुचविले. यादरम्यान अर्चनाने सचिन याला आपले सासरे पुरूषोत्तम पुट्टेवार यांना संपविण्याची सुपारी दिली. याप्रकरणात आपले किंवा ड्रायव्हर सार्थक याचे नाव समोर यायला नको असे बजावले होते. त्यानुसार कट रचून एक जुनी कार खरेदी करण्यात आली. अपघात घडवून आणण्यासाठी निरज निमजे याची मदत घेण्यात आली. त्यासाठी नीरजला १ लाख ६० हजार रुपये मिळाले. प्लॅन ठरल्यानंतर २२ मे रोजी निरजने ती जुनी कार चालवली. सोबत सार्थकही त्या कारमध्ये होता. सचिन धार्मिक हा बाईकने पुट्टेवार यांच्या ई-रिक्षाचा पाठलाग करत होता. ते रिक्षातून खाली उतरताच नीरजने त्यांना कारने उडविले. हा एक अपघात आहे असा बनाव करण्यात आला.
लोभी अर्चनाच्या कमाईला भ्रष्टाचाराची किनार?
गडचिरोलीत अर्चना पुट्टेवार नगर रचना विभागात सहाय्यक संचालक पदावर कार्यरत आहे. तिच्या सासऱ्याची कोट्यवधी रुपयांची संपत्ती हडपण्यासाठी तिने खून केल्याचे पोलिस तपासात स्पष्ट झाले आहे. यानिमित्ताने तिच्या लोभी स्वभावाची ओळख पुढे आली आहे. त्यामुळे गडचिरोलीत नगर रचना विभागाकडून दिल्या जाणाऱ्या नवीन ले-आऊटसह अनेक कामांच्या मंजुरीसाठी तिने मोठी कमाई केली असल्याची शक्यता वर्तवली जात आहे. त्यामुळे त्यांच्या कार्यकाळातील कामांची चौकशी केल्यास काही नियमबाह्य करामती पुढे येण्याची शक्यता नाकारता येत नाही. याशिवाय त्यांच्या कमाईची चौकशी करण्याचीही मागणी केली जात आहे.
