नवचैतन्य टाईम्स अंबेजोगाई प्रतिनिधी(सुग्रीव कदम)-अखेरच्या फेरीपर्यंत चुरशीच्या झालेल्या बीड लोकसभा मतदारसंघात माजी मंत्री आणि भाजपच्या नेत्या पंकजा मुंडे यांना पराभवाचा धक्का बसला आहे. महाविकास आघाडीकडून राष्ट्रवादी काँग्रेस : शरदचंद्र पवार पक्षाचे उमेदवार बजरंग सोनवणे यांनी मुंडे यांचा ७ हजारहून अधिक मतांनी पराभव केला. शेवटच्या फेरीपर्यंत पंकजा मुंडेंना अटीतटीची लढत द्यावी लागली. ३१ व्या फेरी अखेर पंकजाना केवळ ४०० मतांची आघाडी होती. अखेर पूर्ण मतमोजणी झाल्यानंतर बजरंग सोनवणे यांना विजय घोषीत करण्यात आले.
२०१९ च्या विधानसभा निवडणुकीत परळी विधानसभा मतदारसंघातून झालेल्या पराभवानंतर पंकजांना लोकप्रतिनिधित्व करण्याची संधी मिळाली नव्हती. त्यामुळे खासदारकीचं स्वप्न पाहत त्या कुटुंबाच्या पारंपरिक मतदारसंघातून लोकसभेच्या रिंगणात उतरल्या होत्या. दोन वेळा खासदार राहिलेल्या बहीण प्रीतम मुंडे यांचा पत्ता पक्षाने कट करुन पंकजांना तिकीट दिले होते.
निवडणूक कुठलीही असो त्यात संघर्ष, स्पर्धा, अटीतटीची लढत नाही, असे बीडमध्ये कधी होत नाही. त्याला यंदाची लोकसभा निवडणूकही अपवाद ठरलेली नाही. महायुतीच्या पंकजा मुंडे, महाविकास आघाडीचे बजरंग सोनवणे आणि वंचित बहुजन आघाडीचे अशोक हिंगे यांच्यात अत्यंत अटीतटीची लढत या वेळी पाहावयास मिळाली. विकासाच्या आणि राष्ट्रीय मुद्द्यांवर निवडणुकीत चर्चा होतानाच अखेरच्या टप्प्यात निवडणूक वेगळ्याच वळणावर जात असल्याचे चित्र दिसले.
महायुती, महाविकास आघाडीने अत्यंत प्रतिष्ठेच्या केलेल्या या निवडणुकीत बीडकर कुणाला विजयाची माळ घालणार, याची उत्सुकता सर्वांनाच होती. भारतीय जनता पक्षाचे ज्येष्ठ नेते गोपीनाथ मुंडे यांची जन्मभूमी व कर्मभूमी म्हणून बीडची ओळख. गोपीनाथ मुंडे बीडमधून दोन वेळा लोकसभेत विजयी झाले. त्यांच्या निधनानंतर बीडवासीयांनी त्यांच्या कन्या डॉ. प्रीतम मुंडे यांना दोन निवडणुकांत विजयी केले. गेल्या पाच वर्षांत राज्यात झालेले राजकीय बदल, जिल्ह्यातील राजकीय गणितांची उलथापालथ आणि मराठवाड्यात प्रभावी असलेला मराठा आरक्षणाचा मुद्दा यामुळे या वेळी बीड लोकसभा मतदारसंघाचे राजकीय गणित पुरते बदलून गेले होते. महायुतीकडून प्रीतम यांच्याऐवजी त्यांच्या भगिनी माजी मंत्री पंकजा मुंडे; तर महाविकास आघाडीकडून बजरंग सोनवणे रिंगणात होते. वंचित बहुजन आघाडीने अशोक हिंगे यांना निवडणुकीच्या मैदानात उतरवले होते. एकूण ४१ उमेदवार लोकसभेच्या रिंगणात होते. अपक्ष व अन्य उमेदवार कुणाची किती मते खेचणार, यावर जय पराजयाची गणिते अवलंबून होती.
बीडच्या निवडणुकीत प्रतिस्पर्ध्यांवर जोरदार आरोप-प्रत्यारोप करण्याची अक्षरश: स्पर्धा असते. आधीच पाणीटंचाईने त्रस्त असलेल्या बीड जिल्ह्यात राजकीय वातावरण पुरते तापलेले होते. मराठा आरक्षण आंदोलनाचा प्रभाव आणि धग निवडणुकीत पाहावायस मिळाली. जातीय ध्रुवीकरणाची मतदारसंघात शक्यता व्यक्त केली जात होती.
पंकजा यांचे भाऊ धनंजय मुंडे, अमरसिंह पंडित, प्रकाश सोळंके, सुरेश धस बाळासाहेब आजबे, नमिता मुंदडा, लक्ष्मण पवार, रमेश आडसकर, मोहन जगताप आदी मंडळी आपापल्या भागामध्ये तळ ठोकून होती. दुसरीकडे महाविकास आघाडीचे उमेदवार बजरंग सोनवणे यांच्यासाठी आमदार संदीप क्षीरसागर, राष्ट्रवादी काँग्रेस शरदचंद्र पवार पक्षाचे युवक प्रदेशाध्यक्ष मेहबूब शेख, माजी आमदार उषा दराडे, साहेबराव दरेकर, पृथ्वीराज साठे, बदामराव पंडित आदींच्या मदतीने किल्ला लढवत होते. अशोक हिंगे यांच्यासाठी वंचित बहुजन आघाडीचे प्रमुख प्रकाश आंबेडकर यांनी सभा घेतली. या राजकीय लढाईत विजयाचा गुलाल कोण उधळणार याकडे राज्याचे लक्ष लागले होते.
