नवचैतन्य टाईम्स सातारा जिल्हा प्रतिनिधी(डॉ.अरुण राजपुरे)- अघोरी पूजा, जादूटोणा, चमत्कार करून त्याच्या विक्रीतून व पैशांचा पाऊस पाडून हवेतून गुप्तधन काढून देण्याचे आमिष दाखवून वेळोवेळी रोख व ऑनलाईन स्वरूपात ३६ लाख रुपयाची फसवणूक केली असुन या प्रकरणी संशयित आरोपी पंढरीनाथ गणपती पवार उर्फ काका महाराज (रा. कपडे भवानवाडी, ता. पोलादपूर, जि. रायगड) याला गुन्हे शाखेच्या पोलिसांनी २४ तासाच्या आत पोलादपूर येथून ताब्यात घेतले. काका महाराज याच्या विरोधात शहर पोलीस ठाण्यात मंगळवारी फिर्याद देण्यात आली होती.
सातारा शहर पोलीस ठाण्यात फसवणुकीची तक्रार दाखल झाल्यानंतर पोलीस अधीक्षक समीर शेख, अप्पर पोलीस अधीक्षक आंचल दलाल, सातारा उपविभागीय पोलीस अधिकारी राजीव नवले यांच्या मार्गदर्शनाखाली सातारा शहर पोलीस ठाण्याचे वरिष्ठ पोलीस निरीक्षक राजेंद्र म्हस्के यांनी गुन्ह्यातील संशयित आरोपीस तात्काळ ताब्यात घेण्याच्या सूचना दिल्या होत्या.
सातारा डीबी पथकाने संशयित आरोपीची माहिती मिळवून रायगड जिल्ह्यामध्ये काही संशयितांना ताब्यात घेऊन त्यांच्याकडे चौकशी केली. त्यानंतर संशयित आरोपीस पोलादपूर येथे पोलिसांनी ताब्यात घेतले. त्याने घडलेला हा प्रकार अन्य साथीदाराच्या मदतीने केला असल्याची कबुली दिली आहे. या गुन्ह्यातील संशयित आरोपीची चौकशी सुरू असून गुन्ह्यात आणखी कोणाकोणाचा सहभाग आहे. याचा पोलीस तपास करीत आहेत. या गुन्ह्याचा अधिक तपास सहायक पोलीस निरीक्षक मते करीत आहेत.
ही कारवाई पोलीस अधिक्षक समीर शेख, अप्पर पोलीस अधिक्षक आंचल दलाल, उपविभागिय अधिकारी सातारा राजीव नवले, वरिष्ठ पोलीस निरीक्षक राजेंद्र मस्के यांच्या मार्गदर्शनाखाली गुन्हे प्रकटीकरण पथकाचे पोलीस उपनिरीक्षक सुधीर मोरे, पोलीस हवालदार निलेश यादव, सुजीत भोसले, निलेश जाधव, पोलीस नाईक पंकज मोहिते, विक्रम माने, पोलीस कॉन्स्टेबल सचिन रिटे, इरफान मुलाणी, संतोष घाडगे, सागर गायकवाड, विशाल धुमाळ, मच्छिंद्रनाथ माने, सुशांत कदम, तुषार भोसले यांनी केली आहे.
