नवचैतन्य टाईम्स सातारा प्रतिनिधी( शरद झावरे)- कराड तालुक्यातील बेलवडे बुद्रुक गावातील लेकीने वैद्यकीय क्षेत्रातील एमबीबीएसच्या परीक्षेत उत्कृष्ट अशी कामगिरी केली आहे. श्रेया हर्षवर्धन मोहिते या विद्यार्थीने नामांकित कृष्णा विश्व विद्यापीठात एमबीबीएसच्या द्वितीय वर्षातील सर्व विषयात गोल्ड मेडल मिळवून प्रथम क्रमांक पटकावला आहे. एमबीबीएस द्वितीय वर्षातील 'ॲनाटोमी', 'बायोकेमिस्ट्री' , 'मायक्रोबायोलॉजी', या सर्व विषयात प्रथम क्रमांक मिळवून तिने तब्बल चार गोल्ड मेडलवर आपले नाव कोरले आहे. नुकताच कृष्णा विश्व विद्यापीठाचा पदवीदान समारंभ पार पडला यात श्रेयाचा विशेष सत्कार करण्यात आला. तिच्या या यशाने कुटुंबीयांसह ग्रामस्थ भारावून गेले आहेत.
यापूर्वीही तिने प्रथम वर्षात सर्व विषयात गोल्ड मेडल पटकावून प्रथम क्रमांक मिळवला होता. श्रेया ही सहकारमहर्षी स्वर्गीय जयवंतराव भोसले यांचे सहकारी व बेलवडे बुद्रुक गावचे माजी सरपंच स्वर्गीय मोहनराव मोहिते यांची नात आहे. तिचे वडील हर्षवर्धन मोहिते हे कराड तालुक्यात राजकीय क्षेत्रात कार्यरत आहेत. ते भाजपचे राज्य कार्यकारिणी सदस्य डॉ. अतुल भोसले यांचे सहकारी म्हणून कार्यरत आहेत. तिच्या यशाने ग्रामस्थांचा ऊर अभिमानाने भरुन आला आहे.
श्रेया ही बेलवडे बुद्रुक गावची कन्या आहे. तिचे बालपण बेलवडे बुद्रुक येथेच गेले. प्राथमिक, माध्यमिक व महाविद्यालयीन शिक्षण कराडमधीलच कृष्णा इंग्लिश मीडियम स्कूल (सीबीएसई पॅटर्न) येथे झाले आहे. शिक्षणातील आणि विशेषत: वैद्यकीय क्षेत्रातील तिची आवड पाहून वडील हर्षवर्धन मोहिते आणि आई जयश्री यांनी तिला प्रोत्साहन दिले. गुणवत्ता आणि कुटुंबाचे पाठबळ या जोरावर तिने कराडच्या नामांकित कृष्णा विश्व विद्यापीठाच्या मेडिकल कॉलेजला एमबीबीएस अभ्यासक्रमाला प्रवेश मिळवला. सध्या ती तिसऱ्या वर्षाचे शिक्षण घेत आहे. एमबीबीएस पदवी घेतलेले तिच्या या गावात काही मोजकेच डॉक्टर आहेत. ते महाराष्ट्राच्या विविध भागात सेवा देत आहेत. त्याच दिशेने श्रेयाची वाटचाल आहे.
या यशाबद्दल कृष्णा विश्व विद्यापीठाच्या १२ व्या पदवीदान समारंभात कुलपती डॉ. सुरेश भोसले यांच्या हस्ते व भारतीय वैद्यकीय संशोधन परिषदेचे माजी प्रमुख पद्मश्री डॉ. रमण गंगाखेडकर , कुलपतींचे प्रधान सल्लागार डॉ. वेदप्रकाश मिश्रा, प्र-कुलपती डॉ. प्रवीण शिनगारे, कुलगुरु डॉ. नीलम मिश्रा, व्यवस्थापकीय मंडळाचे सदस्य विनायक भोसले, दिलीप पाटील, सौ. मनिषा मेघे, कार्यकारी संचालक पी. डी. जॉन, परीक्षा नियंत्रक डॉ. ज्योत्स्ना पाटील, संशोधन संचालक डॉ. डी. के. अगरवाल, कृष्णा हॉस्पिटलचे वैद्यकीय संचालक डॉ. ए. वाय. क्षीरसागर, मेडिकल ॲकडमिनिस्ट्रेटर डॉ. आर. जी. नानिवडेकर, कुलसचिव डॉ. एम. व्ही. घोरपडे आदी मान्यवर उपस्थित होते. त्यांच्या हस्ते श्रेयाचा विशेष सत्कार करुन तिला गोल्ड मेडल व प्रशस्तीपत्र प्रदान करण्यात आले.
लेकीच्या या यशाची बातमी गावात समजताच ग्रामस्थांच्या आनंदाला पारावर उरला नाही. ग्रामस्थांनी भरभरून तिचे कौतुक केले. गावातील व्हाट्सॲप ग्रुपमध्ये तर तिच्यावर अभिनंदनचा वर्षाव झाला. श्रेयाने म्हटले आहे की, " वैद्यकीय क्षेत्रातील एमबीबीएस अभ्यासक्रमाच्या प्रथम व द्वितीय वर्षात माझ्याकडून उत्तम कामगिरी झाली आहे. सध्या तिसऱ्या वर्षाचे शिक्षण घेत आहे. त्यामुळे हा यशाचा आलेख चढता ठेवावा, अशा कुटुंबीय, गुरुजन व ग्रामस्थांच्या निश्चित माझ्याकडून अपेक्षा आहेत. ही अपेक्षा मी पूर्ण करेन, असा त्यांना विश्वास आहे. शैक्षणिक गुणवत्तेच्या पातळीवर आणखी परिश्रम घेऊन उत्तुंग भरारी घेत हा विश्वास नक्कीच सार्थ ठरवेन."
