नवचैतन्य टाईम्स मुंबई प्रतिनिधी(नेहाल हसन)- मुंबईतील दामोदर नाट्यगृहाचा प्रश्न पुन्हा एकदा ऐरणीवर आला आहे. गेले अनेक महिने दामोदर नाट्यगृह वाचवण्यासाठी नाट्यगृह आणि सहकारी मनोरंजन मंडळ प्रयत्न करत आहे मात्र सरकारी आश्वासनानंतरही या नाट्यगृहाचं तोडकाम सुरू करण्यात आलं आहे. हे नाट्यगृह तोडून तिथे नवीन नाट्यगृह उभारण्याचा प्रस्ताव मांडण्यात आला होता मात्र नवीन प्लॅन जमा केल्याशिवाय तोडकाम करण्यात येऊ नये असेही आदेश देण्यात आले होते. पालकमंत्र्यांनी दिलेल्या आदेशानंतर तोडकाम थांबवण्यात आलं होतं. मात्र आता आचारसंहिता लागल्यानंतर पुन्हा हे तोडकाम सुरू करण्यात आलं आहे. त्यामुळे अखिल भारतीय मराठी नाट्य परिषदेचे अध्यक्ष प्रशांत दामले यांनी पत्रकार परिषद घेऊन नाट्यगृह वाचवण्यासाठी आपली आक्रमक भूमिका मांडली आहे.
नाट्यगृहाचं जे तोडकाम सुरू करण्यात आलं आहे ते ताबडतोब थांबवावं. सोबतच सर्व कलाकारांच्या ज्या काही मागण्या आहेत त्या पूर्ण कराव्या. जर सर्व कलाकारांच्या मागण्या पूर्ण करण्यात आल्या नाहीत तर सर्व मराठी कलाकार हे आंदोलनाला बसू असा इशारा त्यांनी दिला आहे. नुकत्याच घेण्यात आलेल्या पत्रकार परिषदेत ते म्हणाले, 'नोव्हेंबर महिन्यात दामोदर नाट्यगृह पाडण्यास सुरुवात झाली होती. पण अधिवेशनात प्रवीण दरेकरांनी हा प्रश्न उपस्थित केला होता की हे नाट्यगृह पाडू नये. त्यानंतर उदय सामंत आणि देवेंद्र फडणवीस यांनी शाश्वती दिली की हे नाट्यगृह पडणार नाही. त्यानंतर आचारसंहिता लागली. आता आचारसंहिता लागल्यानंतर ते पाडकाम पुन्हा सुरु झालं. त्यामुळे ही पत्रकार परिषद आम्ही घेतली. दोन्ही संस्था मराठी नाटकांशी आणि माणसांशी संबंधित आहेत. दोन्ही संस्था मराठी लोकांच्या आहेत, त्यामुळे सामोपचाराने गोष्टी व्हाव्यात म्हणून प्रयत्न करत होतो. पण आता परिस्थिती बदलली आहे.'
दामले पुढे म्हणाले, 'त्यांनी बेशिस्तपणा सुरु केल्याने आम्हाला हा पवित्रा घ्यावा लागला आहे. तोडकामाला स्थगिती दिली तरीही तोडकाम करण्यात आलं याचा अर्थ काय होतो? आमच्या काही मागण्या आणि अटी आहेत. त्या सोशल सर्व्हिस लीगने पूर्ण कराव्यात. जर त्या पूर्ण झाल्या नाहीत तर आम्ही मराठी कलाकार आंदोलन करणार. सुरुवातीचे पाच ते सहा दिवस थांबणार आहोत. आम्हाला मुख्यमंत्र्यांनी भेट दिली तर ठिक नाहीतर उपोषण आंदोलनाला बसावं लागेल.' याच पत्रकार परिषदेत बालरंगभूमी परिषदेच्या अध्यक्ष नीलम शिर्केही आल्या होत्या. त्यांनी याबाबत भूमिका मांडली. याबद्दल बोलताना त्या म्हणाल्या, 'दामोदर नाट्यगृहासाठी जे आंदोलन सुरु आहे त्यात माझा सहभाग आहे. उपोषणाला बसायची वेळ आली तरीही मी बसेन. नाट्यगृह वाचवणं अत्यंत गरजेचं आहेत.' अशी नाट्यगृहं बंद झाली तर नाटकं करायची कुठे, असा प्रश्नही त्यांनी उपस्थित केला.
