नवचैतन्य टाईम्स जत प्रतिनिधी(संजय शिंदे)- : गर्भलिंग परीक्षणानंतर कर्नाटकात गर्भपात करताना एका ३२ वर्षीय महिलेचा मृत्यू झाला. वैद्यकीय प्रमाणपत्रासाठी तिचे नातेवाइक सांगली शहरात मोटारीत मृतदेह घेऊन फिरत होते. पोलिसांच्या दक्षतेमुळे हा प्रकार उघड झाला. या प्रकरणी बस स्थानक परिसरात सोमवारी सायंकाळी पोलिसांनी तिघांना ताब्यात घेतले. संबंधित महिलेचा मृतदेह उत्तरीय तपासणीसाठी सरकारी रुग्णालयात आणण्यात आला
काय आहे प्रकरण?
मृत महिला मिरज तालुक्यातील माहेरवाशीण आहे, तिचे सासर कोल्हापूर जिल्ह्यातील हातकणंगले तालुक्यात आहे, अशी माहिती तपासात पुढे आली आहे. पोलिसांनी सांगितले, की मृत महिलेचा पती सैन्यदलात आहे. तिला दोन मुली आहेत. ती गरोदर असल्याने घरातील नातेवाइकांनी काही दिवसांपूर्वी जयसिंगपूरमधील एका रुग्णालयात गर्भलिंग चाचणी केल्याचे समजते. चाचणीचा अहवाल मिळताच नातेवाइकांनी गर्भपात करण्यासाठी कर्नाटकातील महालिंगपुरम (ता. चिकोडी) गाठले. तेथील एका रुग्णालयात महिलेचा गर्भपात करण्यात आली. त्यानंतर काही वेळाने तिचा मृत्यू झाला. मात्र, तेथील वैद्यकीय अधिकाऱ्यांनी मृत्यू प्रमाणपत्र देण्यास नकार दिला.
महिलेचा मृतदेह मोटारीत घेऊन तिचे नातेवाइक सोमवारी सायंकाळी सांगलीत आले होते. त्यांच्यासमवेत मिरज तालुक्यातील एक डॉक्टरही होते. या प्रकारची माहिती सांगली शहर पोलिस ठाण्याचे निरीक्षक संजय मोरे यांना समजली. त्यांनी तातडीने गुन्हे प्रकटीकरण शाखेचे गौतम कांबळे, मच्छिंद्र बर्डे आणि सुमीत सूर्यवंशी यांना माहिती दिली.
महिलेच्या मृतदेहासह दोघे जण मोटारीत बसल्याचे पोलिसांना दिसले. चौकशीनंतर हा प्रकार उघड झाला. रात्री उशिरापर्यंत वैद्यकीय अहवाल प्राप्त झाला नव्हता. हा गुन्हा चिकोडी पोलिस ठाण्यात वर्ग करण्यात येणार आहे.
