नवचैतन्य टाईम्स मुंबई प्रतिनिधी(नेहाल हसन)- कोकण हार्टेड गर्ल अर्थात अंकिता वालावकर तिच्या एका लेटेस्ट व्हिडिओमुळे चर्चेत आली आहे. तिने महाराष्ट्रातील टोल प्रश्नावर भाष्य करणारा एक व्हिडिओ शेअर केला. याशिवाय तिने तिच्यासोबत घडलेला प्रकार या व्हिडिओमध्ये शेअर केला. 'टोल का झोल' असं कॅप्शन देत अंकिताने हा व्हिडिओ शेअर केला.
काय आहे कोकण हार्टेड गर्लची तक्रार?
अंकिता या व्हिडिओमध्ये सांगते आहे की तिला एका घटनेबद्दल सर्वांना जागरुक करायचं आहे. अंकिता म्हणाली की, 'दिनांक २६ मार्च २०२४ रोजी मी मालवण ते मुंबई असा प्रवास करत होते. वाशी टोलनाक्यावर जेव्हा माझी गाडी आली, तेव्हा मला असं सांगण्यात आलं की फास्टटॅग स्कॅन होत नाही आहे. त्यामुळे तुम्ही रोख रक्कम द्या.' अंकिताने व्हिडिओमध्ये एक ४५ रुपयांची पावतीही दाखवली, जी तिला टोलनाक्यावर रोख रक्कम भल्यावर देण्यात आली होती.
अंकिताने पुढे असे सांगितले की, 'जेव्हा मी मुंबईत पोहोचले तेव्हा मला फास्टटॅगमधून पैसे वजा झाल्याचा मेसेज आला.' अंकिताने सांगितले की त्या मेसेजमध्ये असे लिहिले होते की जर काही अडचण आल्यास दिलेल्या टोल फ्री क्रमांकावर संपर्क करावा. तिच्या मते तिने तो क्रमांक ५ दिवस लावून पाहिला, पण समोरुन प्रतिसाद मिळाला नाही.
ती पुढे म्हणतेय की, 'मग मी विचार केला की जाऊ दे यार, ४५ रुपयेच तर होते. काय एवढा वेळ फुकट घालवायचा? पण माझ्यासारख्या अशा हजारो लोकांनी ४५ रुपये सोडले तर काय होईल... हा विचार करुन मला या विषयावर बोलावसं वाटलं. जेव्हा राजसाहेब (राज ठाकरे) टोलनाक्याच्या मुद्द्यावर बोलतात, तेव्हा कमेंट सेक्शनमध्ये अशा प्रतिक्रिया येतात की यांच्याकडे फक्त टोल हा एकच मुद्दा आहे का? पण टोल हा मुद्दा किती गांभीर्याने घेतला पाहिजे, या टोलमध्ये किती झोल आहेत याचं हे एक उत्तम आणि जिवंत उदाहरण.'
अंकिताने व्हिडिओच्या शेवटी असा सल्ला दिला की, यापुढे कधी तुमची गाडी टोलनाक्यावर आल्यानंतर तुम्हाला असं सांगण्यात आलं की फास्टटॅग स्कॅन होत नाहीये आणि त्यामुळे रोख रक्कम द्या. तर त्यांना एकच सांगा की, भारत चंद्रावर पोहोचला, तरी पण अजून तुमचे जर स्कॅनर नीट नाहीत तर ते आधी नीट करुन घ्या.
