नवचैतन्य टाईम्स मुंबई प्रतिनिधी(एस.डी.कदम)-अभिनेत्री जुई गडकरी सध्या 'ठरलं तर मग' मालिकेतून लोकप्रियतेच्या शिखरावर पोहोचली आहे. याआधी अभिनेत्रीने 'पुढचं पाऊल', 'तुजवीण सख्या रे' यांसारख्या मालिका आणि 'बिग बॉस मराठी'सारख्या रिॲलिटी शोमुळे तिला विशेष लोकप्रियता मिळाली. त्यामुळे अभिनेत्रीचा एक मोठा चाहतावर्ग आहे. अभिनेत्री अनेकदा तिच्या चाहत्यांसोबत संवाद साधताना दिसते. मात्र अलीकडेच तिची चाहती असण्याचा दावा करणाऱ्या एका इन्स्टाग्राम युजरकडून अभिनेत्रीला धमकी मिळाली आहे.
जुईने इन्स्टाग्रामवर एक स्टोरी शेअर केली असून तिने या युजरने दिलेल्या धमकीला सडेतोड उत्तर दिले आहे. संबंधित युजरने असे लिहिले आहे की, 'काय गं तुला माज आलाय का, आम्ही तुला फॉलो करायचं आणि तुला आम्हाला फॉलो करायला काय झालं? कळत नाही का? आताच्या आता आम्हाला फॉलो करायचं, सपना पांचाळ, राखी सुतार, करुणा विन्हेरकर, यश विन्हेरकर यांना... तू फॉलो कर नाहीतर तुला जेलमध्ये टाकेन. आजपर्यंत तू आमची आवडती हिरॉइन होतीस. कारण आम्हाला वाटायचं की तू फॉलो करशील आम्हाला, पण नाही... आणि म्हणून मी तुला पोलिसात टाकेन. उद्याच्या उद्या तुझ्या गावाला येते कर्जतला समजल. कुठेही पळायचं नाही, ओके बाय.'
अशा विचित्र मागणीसाठी पोलिसात जाण्याची भाषा करणाऱ्या युजरला अभिनेत्रीने सुनावले की, 'अशा गोष्टी सहन केल्या जाणार नाहीत, आधीच सांगते. थेट पोलीस स्टेशनलाच भेटू मग आपण'. ज्या इन्स्टाग्राम पेजवरुन जुईला धमकी आली आहे त्या युजरला टॅग करत तिने असेही म्हटले की, '@rakhee_sutar झालीस तू फेमस, येच कर्जतला, बघतेच मी पण!' अभिनेत्रीने अशाप्रकारे उत्तर देत या युजरची बोलती बंद केली आहे.
याआधी अनेकदा जुईने चाहत्यांसोबतचे संभाषण सोशल मीडियावर शेअर केले आहे. ती इन्स्टाग्रामवर अनेकदा सेशन घेते आणि चाहत्यांच्या प्रश्नांची उत्तरं देते, मात्र असा अनुभव तिला पहिल्यांदाच आला असावा. अभिनेत्रीने हा स्क्रिनशॉट तिच्या इन्स्टाग्रामवर शेअर केल्याने तिला यावर आणखी काही प्रतिसाद मिळेल का, हे पाहणं महत्त्वाचं ठरेल.