नवचैतन्य टाईम्स मुंबई प्रतिनिधी(नेहाल हसन)-शेअर बाजारातील गुंतवणूक धोक्याच्या अधीन असून आर्थिक नुकसान संभव आहे आणि म्हणूनच बरेच लोकं मार्केटमध्ये गुंतवणूक करताना संकोच करतात. परंतु स्टॉक मार्केटमधील गुंतवणुक किती फायद्याची आहे हे चंदीगड येथील एका डॉक्टरच्या अनुभवातून स्पष्ट होते. चंदीगडमधील एका डॉक्टरला आजोबांनी वर्षानुवर्षे पूर्वी केलेल्या गुंतवणुकीमुळे अक्षरशः लॉटरी लागली आहे. चंदीगड येथील बालरोगतज्ञ डॉ. तन्मय मोतीवाला यांना अचानक आपल्या आजोबानी केलेल्या जुनी गुंतवणुकीची कागदपत्रे सापडली आणि आश्चर्याचा सुखद धक्काच बसला.
आजोबांच्या गुंतवणुकीने नातवाला लॉटरी
एकेदिवशी आपल्या कुटुंबाची संपत्ती व्यवस्थापित करण्यासाठी कागदपत्रे तपासत असताना डॉ. तन्मय मोतीवाला यांना स्टेट बँक ऑफ इंडियाचे (एसबीआय) शेअर सर्टिफिकेट मिळाले. त्यांना कळले की त्यांच्या आजोबांनी १९९४ मध्ये ५०० रुपयांचे एसबीआयचे शेअर्स खरेदी केले होते मात्र, आजोबांनी शेअर्स कधीही विकले नाहीत. तसेच ते विसरून देखील गेले.
इतक्या रकमेत रुपांतर
डॉ. मोतीवाला यांच्या आजोबांच्या सुरुवातीच्या गुंतवणुकीचे रूपांतर आता मोठ्या रकमेत झाले आहे. डॉक्टरांनी खुलासा केला की एसबीआयचे शेअर्स आता ३.७५ लाख रुपयांचे झाले आहेत म्हणजे तीन दशकात त्यांना ७५० पट परतावा मिळाला आहे.
सोशल मीडियावर पोस्ट
एक्सवरील एका पोस्टमध्ये डॉ. मोतीवाला यांनी लिहिले, माझ्या आजोबांनी १९९४ मध्ये ५०० रुपये किमतीचे एसबीआयचे शेअर्स खरेदी केले होते. त्याचा त्यांना विसर पडला होता. त्यांनी ते का विकत घेतले किंवा ते आपल्याजवळ आहेत याची त्यांना कल्पना नव्हती. कौटुंबिक मालमत्तेची कागदपत्रे तपासताना मला ते सापडले.
पुढे पोस्टमध्ये मोतीवाला लिहितात, बऱ्याच लोकांनी सध्याच्या मूल्यांकनाबद्दल विचारले. लाभांश वगळता अंदाजे ३.७५ लाख रुपयांचे शेअर्स आहेत. खूप मोठी रक्कम नाही, पण हो, ३० वर्षांत ७५० पट परतावा गुंतवणूकदारांसाठी खरंच फायद्याचा आहे. त्यांच्या पोस्टमध्ये त्यांनी आपल्या कौटुंबिक शेअर्स प्रमाणपत्रांचे डीमॅटमध्ये रूपांतर कसे केले हे देखील सांगितले. त्यांच्या म्हणण्यानुसार, आम्ही सल्लागाराची मदत घेतली. कारण ही प्रक्रिया लांबलचक आहे. सल्लागाराला वेळ लागला. परंतु आम्ही बहुतेक प्रमाणपत्रांसाठी हे करू शकलो आहोत.
शेअर्सचं आता काय करणार?
डॉ. मोतीवाला यांनी पुढे खुलासा केला की ते सध्या हे शेअर्स विकणार नाहीत. कारण त्यांना रोख रकमेची गरज नाही. एक्स प्लॅटफॉर्मवर शेअर केल्यानंतर,त्याची पोस्ट व्हायरल झाली आहे. त्यांच्या पोस्टला प्रतिसाद देताना एकाने म्हटले, ही खरी गुंतवणूक आहे. आपल्या ज्येष्ठांकडून शिकले पाहिजे.
दुसऱ्याने त्यांच्या पोस्टवर लिहिले, माझ्यासोबतही असेच घडले, माझ्या आजोबांकडे एसबीआयचे ५०० शेअर्स होते. ते एक कर्मचारी होते तर माझ्या वडिलांच्या मृत्यूनंतर मला हे तेकसे तरी मिळाले. त्यावेळी मी १७ वर्षांचा होतो. नंतर जवळच्या स्टॉक ब्रोकरकडे गेलो आणि काही प्रक्रियेनंतर आम्ही ते विकू शकलो. अशा प्रकारे मी इक्विटीमध्ये गुंतवणूक करण्यास सुरुवात केली.
