नवचैतन्य टाईम्स पुणे प्रतिनिधी(रावसाहेब काळे)- महाराष्ट्र नवनिर्माण सेनेचे (मनसे) प्रमुख राज ठाकरे यांनी लोकसभा निवडणुकीत ‘महायुती’ला पाठिंबा जाहीर केल्याने पुणे शहरातील ‘मनसे’च्या सरासरी असलेल्या दहा टक्के मतांवर त्याचा कसा परिणाम होणार, याची शहरात चर्चा रंगली आहे. गेल्या महापालिका निवडणुकीत ‘मनसे’ला पावणेचार लाख, तर विधानसभेला एक लाख मते मिळाली होती. यंदाच्या लोकसभा निवडणुकीत भाजपविरोधात असलेले दोन्हीही उमेदवार हे ‘पूर्वाश्रमी’चे ‘मनसे’चे असल्याने ‘मनसे’ची मते तीन ठिकाणी विभागली जातील, अशी शक्यता यानिमित्ताने व्यक्त होत आहे.
ठाकरे यांनी शिवतीर्थावरून ‘महायुती’ला पाठिंबा जाहीर केल्यानंतर त्याचे पडसाद पुण्यात उमटले. पुणे शहरात मनसेला गेल्या निवडणुकांमध्ये सरासरी दहा टक्के मिळाली आहेत. विधानसभा; तसेच लोकसभेला सुमारे एक लाख मते मिळाली आहेत. याशिवाय २०१२ आणि २०१७ च्या महापालिका निवडणुकीत अनुक्रमे पाच आणि तीन लाख मते मिळाली आहेत. पुणे शहराशी संबंधित असलेल्या शिरूर, हडपसर आणि पुणे लोकसभा मतदारसंघांत त्याचा फायदा होण्याचा दावा महायुतीच्या नेत्यांकडून करण्यात येत आहे.
रवींद्र धंगेकर आणि वसंत मोरे
काँग्रेसचे उमेदवार रवींद्र धंगेकर आणि वंचित बहुजन आघाडीचे उमेदवार वसंत मोरे हे दोघेही ‘मनसे’तून बाहेर पडलेले उमेदवार पुणे लोकसभेच्या रिंगणात आहे. या दोघांचाही ‘मनसे’त असलेला संपर्क पाहता त्यांना ‘मनसे’ची काही मते मिळण्याची शक्यता आहे. राज ठाकरे यांनी ‘महायुती’ला पाठिंबा जाहीर केल्यामुळे मनसेची काही मते आता भारतीय जनता पक्षाचे उमेदवार मुरलीधर मोहोळ यांनाही मिळण्याची शक्यता आहे. त्यामुळे ‘मनसे’च्या मतांची तीन ठिकाणी विभागणी होईल, अशी शक्यता वर्तविण्यात येत आहे.
२००९ ची लोकसभा आणि मनसे
सन २००४ च्या पुणे लोकसभेच्या निवडणुकीत काँग्रेसचे उमेदवार सुरेश कलमाडी आणि भाजपचे उमेदवार प्रदीप रावत यांना अनुक्रमे ४९ आणि ३९ टक्के मते मिळाली होती. या दोघांमध्ये दहा टक्के मतांचा फरक होता. मात्र, २००९च्या लोकसभा निवडणुकीत कलमाडी यांनी पुन्हा विजय मिळवला असला तरी त्यांच्या विजयामध्ये केवळ साडेतीन टक्के मतांचा फरक होता. तर, या निवडणुकीत मनसेला सुमारे दहा टक्के मते मिळाली होती.
२०१४ ची लोकसभा आणि मनसे
या सार्वत्रिक निवडणुकीत पुण्यातून मनसेचे उमेदवार दीपक पायगुडे यांना ९४ हजार मते मिळाली होती. या निवडणुकीत भाजपचे उमेदवार अनिल शिरो‌ळे हे तीन लाख मतांहून अधिक मताधिक्याने निवडून आले असले तरी मनसेची मते कायम राहिली होती. सलग दोन निवडणुकांमध्ये मनसेच्या मतांच्या टक्केवारीत फरक पडलेला नव्हता.
महापालिका निवडणूक आणि मनसेची मते
२०१२ : पाच लाख १९ हजार ४३७ मते (२९ नगरसेवक)
२०१७ : तीन लाख ७३ हजार ६४५ मते (दोन नगरसेवक)
लोकसभा निवडणूक आणि मनसेची मते
२००९ : ७५ हजार ८८७
२०१४ : ९३ हजार ४४९
महाराष्ट्र नवनिर्माण सेनेचे प्रमुख राज ठाकरे यांनी ‘महायुती’ला दिलेला बिनशर्त पाठिंबा, हा त्यांच्या देशाच्या विकासाबद्दल असलेला सच्चेपणा अधोरेखित करतो. हिंदू नववर्षाच्या शुभदिनी केलेल्या या घोषणेमुळे महायुतीच्या कार्यकर्त्यांना निश्तितच बळ मिळाले आहे. पुणे लोकसभा निडणुकीतही मनसैनिकांना सोबत घेऊन आम्ही एकदिलाने सामोरे जावू आणि मोठ्या मताधिक्याने जिंकू.
मुरलीधर मोहोळ, उमेदवार, भाजप
