नवचैतन्य टाईम्स मुंबई प्रतिनिधी(एस.डी.कदम)- अक्कलकोट विराजमान श्री स्वामी समर्थ महाराजांचा आज १० एप्रिल रोजी प्रकटदिन आहे. अक्कलकोट स्वामींना श्रीपाद वल्लभ व श्रीनृसिंगसरस्वती यांच्या नंतरचे भगवान श्रीदत्ता दत्तात्रेयांचे ते तिसरे पूर्णावतार अवतार आहेत अस म्हटलं जातं.गाणगापूरचे श्री नृसिंह सरस्वती हेच नंतर श्रीस्वामी समर्थांच्या रूपाने प्रकट झाले असे ही म्हंटलं जातं. स्वामींवर ’देऊळ बंद’ हा चित्रपट २०१५ मध्ये प्रदर्शित करण्यात आला होता. 'भिऊ नकोस मी तुझ्या पाठीशी आहे' असं म्हटलं तरी भक्तांना सकारात्मकता जाणवू लागते. बऱ्याच जणांना स्वामींचा अनुभव आला आहे. असाच अनुभव काही मराठी कलाकारांना देखील आला आहे. मराठी सिनेसृष्टीतील असे काही कलाकार आहेत जे स्वामींचे भक्त आहेत. आम्ही तुम्हाला अशाच काही कलाकारांबद्दल सांगणार आहोत.
निवेदिता सराफ
लोकप्रिय अभिनेत्री निवेदिता सराफ या स्वामींच्या भक्त आहेत. निवेदिता म्हणाल्या, 'अभिनेते अशोक सराफ आणि त्यांच्या आई या स्वामी भक्त असल्यामुळे घरात स्वामींच्या चरित्राचं पारायण केलं जायचं. त्यांच्यामुळे स्वामींशी माझी ओळख झाली. त्यांचं चरित्र मी वाचू लागले. स्वामींनी कधीही त्यांची भक्ती करा असं सांगितलं नाही. ते कायम देत राहिले. मी स्वामींवर विश्वास ठेवून इमारतीवरून उडीही मारू शकते कारण मला माहितीये स्वामी मला पकडायला असणार आहेत.'
जितेंद्र जोशी
अभिनेता जितेंद्र जोशी अक्कलकोटला जाणाऱ्या बस मध्ये बसला होता. त्याला तिथे एक आजोबा भेटले ज्यांना त्यांच्या मुलांनी हाकलून दिलं होतं. ते जितेंद्रला म्हणाले मुलं बाळ, घर हे काही खरं नाही. मी आधीच अक्कलकोटला जायला हवं होतं. जेव्हा जितेंद्रने बसमधून उतरल्यावर काही पैसे देण्यासाठी त्यांची वाट पाहिली तेव्हा मात्र ते आजोबा बसमधून खाली आलेच नाहीत. तेव्हापासून जितेंद्रचा स्वामींवरचा विश्वास आणखी घट्ट झाला.
अमृता खानविलकर
अभिनेत्री अमृता खानविलकर हीदेखील स्वामी भक्त आहे. जेव्हा इंडस्ट्रीत काम मिळत नाही तेव्हा तुम्ही स्वतःसाठी काय करता हे सगळ्यात महत्वाचं असतं. मी एक अभिनेत्री असल्याने स्वतःवर विश्वास ठेवणं जास्त गरजेचं असतं. ते करण्याचं बळ मला स्वामींकडून मिळालं. स्वामी भक्तीमुळे माझी अनेक कामं मार्गी लागली. लॉक डाउनमध्ये मला स्वामीं चरित्राची फार मदत झाली असं अमृताने तिच्या युट्यूब चॅनेलवर सांगितलं आहे.
स्वप्नील जोशी
मराठी सिनेसृष्टीचा चॉकलेट बॉय आणि अभिनेता स्वप्नील जोशी हा देखील स्वामी भक्त आहे. स्वामींचा भक्त असलेल्या व्यक्तीला कधीही काही कमी पडत नाही असं स्वप्नील म्हणतो. स्वप्नीलचे आई-वडील स्वामी भक्त असल्याने त्याच्यावर बालपणापासूनच स्वामींच्या भक्तीचे संस्कार घडले गेले. मी स्वामी समर्थांचं नामस्मरण करतो कारण त्यामुळे एक सकारात्मक ऊर्जा मला मिळते असं स्वप्नील म्हणतो.
जुई गडकरी
'ठरलं तर मग' फेम जुई गडकरी ही देखील स्वामींची मोठी भक्त आहे. याबद्दल सांगताना ती म्हणालेली, 'मी अगदी लहानपणापासून स्वामींना मानते किंवा त्यांच करते असे म्हणायला हरकत नाही. जेव्हा मला स्वामींनी मदत केली आहे आणि जेव्हा मी काही अडचणीतून बाहेर येऊ शकत नाही तेव्हा मी ते त्यांच्यावर टाकून मोकळी होते. आज आपल्या आजूबाजूला जे काही सुरु आहे त्या पाठी काहीतरी कारण आहे हे नक्की.'
प्रवीण तरडे
अभिनेते प्रवीण तरडे यांनी स्वामी समर्थांचा एक मोठा अनुभव घेतला आहे. स्वामींनी ऐन अक्कलकोटच्या मठात बसून त्यांच्याकडून चित्रपटाची कथा लिहून घेतली. स्वामींबद्दल काहीही माहीत नसताना त्यांनी इतकी उत्कृष्ट कथा लिहिली आणि तेव्हापासून ते आणि त्यांची पत्नी स्वामींची पूजा करू लागले. तो चित्रपट म्हणजे 'देऊळ बंद' या चित्रपटाने अध्यात्म विज्ञानाच्या पुढे कसं आहे पटवून देण्यात मदत केली.
श्रेयस तळपदे
अभिनेता श्रेयस तळपदे यालाही स्वामींच्या भक्तीचा प्रत्यय वारंवार आला आहे. स्वामी सतत आपल्या पाठीशी आहेत असं तो म्हणतो. एके दिवशी श्रेयसच्या आईने त्याला नाटक सोडून नोकरी बघण्याचा सल्ला दिला. पुरेसे पैसे घरात येत नसल्याने तिने हे सांगितलं. त्यानंतर श्रेयस आणि जितेंद्र जोशी एकत्र दादरला स्वामींच्या मठात गेले. तेव्हा त्यांनी स्वामींकडे प्रार्थना केली. त्यानंतर जे झालं ते संपूर्ण महाराष्ट्राने पाहिलं. श्रेयसला काम मिळालं आणि तो लोकप्रिय कलाकार झाला.
स्वामींचे भक्त
केदार शिंदे
आदेश बांदेकर
चिन्मय उदगीरकर
तितिक्षा तावडे
खुशबू तावडे
यांसारखे आणखीही काही कलाकार हे स्वामींचे भक्त आहेत.
