नवचैतन्य टाईम्स मुंबई प्रतिनिधी(नेहाल हसन)- गेल्या काही महिन्यांत अनेक सेलिब्रिटींनी लग्नगाठ बांधत संसार थाटला. आता दाक्षिणात्य सिनेसृष्टीतील तामिळ सिनेदिग्दर्शक शंकर यांची लेक ऐश्वर्या शंकर नुकतीच विवाहबंधनात अडकली. ऐश्वर्याच्या लग्नाला सुपरस्टार रजनीकांत, तामिळनाडूचे मुख्यमंत्री एम. के. स्टॅलिन तसंच दिग्दर्शक मणीरत्नम यांच्यासह अनेक बड्या सेलिब्रिटींनी हजेरी लावली होती.
ऐश्वर्या शंकर तरुण कार्तिकसोबत लग्नबंधनात अडकली आहे. ऐश्वर्या शंकर आणि तरुण कार्तिक यांच्या लग्नाचे फोटो सध्या सोशल मीडियावर व्हायरल झाले आहेत. या व्हायरल फोटोंमध्ये दोघांचा सुंदर लुक पाहायला मिळत आहे. काही महिन्यांपूर्वीच दोघांचा साखरपुडा पार पडला होता. आता दोघांचं लग्न थाटामाटात पार पडलं आहे.
साऊथ इंडस्ट्रीतले लोकप्रय दिग्दर्शक एस. शंकर यांची लेक ऐश्वर्या हिचा हा दुसरं लग्न आहे. ऐश्वर्याचं पहिलं लग्न क्रिकेटपटू असलेल्या दामोदरन रोहितसोबत झालं होतं. पण एका वादात दामोदरन रोहित याचं नाव समोर आल्यानंतर दोघांनी घटस्फोट घेतला होता.
क्रिकेट प्रशिक्षक थमराय कन्नन यांच्यावर एका १६ वर्षीय मुलीनं लैंगिक छळ केल्याचा गुन्हा दाखल होता, याच प्रकरणात मोदरन रोहित याचं नाव आल्यानं ऐश्वर्या आणि मोदरन रोहित यांच्या नात्यात दूरावा आला होता, त्यानंतर त्यांनी घटस्फोट घेण्याचा निर्णय घेतला.
एस. शंकर यांचे अनेक सिनेमे गाजले. 'इंडियन', 'बॉईज', 'शिवाजी द बॉस', 'आय', '2.0' (रोबोटचा सिक्वेल) अशा अनेक लोकप्रिय चित्रपटाचं त्यांनी दिग्दर्शन केलंय. तसंच त्यांच्या आगामी कामाबद्दल बोलायचं झालं तर त्यांचा 'इंडियन २' हा सिनेमा लवकरच प्रदर्शित होणार आहे.
ऐश्वर्या रजनीकांत यांचा घटस्फोट
दरम्यान, दाक्षिणात्य मनोरंजन विश्वातील लोकप्रिय जोडपं ऐश्वर्या रजनीकांत आणि धनुष यांनी २०२२ मध्ये विभक्त होत असल्याची घोषणा केली. होती. आता या दोघांनी घटस्फोटासाठी अर्ज दाखल केल्याचं समोर आलं आहे. विभक्त होण्याची घोषणा केल्यानंतर त्यांनी काही नात्याचा पुन्हा विचार करणार असल्याचं म्हटलं होतं. मात्र आता त्यांनी वेगळं होण्याचा निर्णय घेतला आहे. धनुष आणि ऐश्वर्या रजनीकांत यांनी अलीकडं चेन्नईच्या कौटुंबिक न्यायालयात घटस्फोटासाठी अर्ज केला आहे. मीडिया रिपोर्टनुसार या जोडप्यानं परस्पर संमतीनं कलम १३ बी अंतर्गत हा याचिका दाखल केली आहे.
