रस्त्यावर गाडी चालवताना सावध राहा’ अशा सूचना वारंवार दिल्या जातात. हायवेंवर तर सावधानतेचा इशारा देणारे मोठमोठे फलक देखील लावलेले दिसतात. कारण गाडी चालवताना कधी काय घडेल सांगता येत नाही. अचानक बॅलेंस जाऊन मोठा अपघात देखील घडू शकतो. याच पार्श्वभूमीवर एक धक्कादायक व्हिडीओ समोर आला आहे. भरधाव वेगानं पळत असलेल्या एका बाईकला वनगायीनं धडक दिली. ही धडक इतकी जोरदार होती की तरुणाच्या छातीत अक्षरश: गायीची शिंग घुसली. पुढे या तरुणाचं काय झालं हे आता तुम्हीच पाहा. हा हृदयद्रावक व्हिडीओ सोशल मीडियावर चांगलाच व्हायरल होत आहे.
नेमकं घडलं तरी काय?
ही घटना उत्तर प्रदेशमधील ईनायतनगर या ठिकाणी घडली आहे. तर त्याचं झालं असं की, २८ वर्षांचा मुकेश पांडे रस्त्यानं बाईक चालवत होता. रस्ता मोकळा असल्यामुळे तो शक्य तितक्या वेगानं बाईक पळवत होता. तेवढ्यात रस्ता ओलांडणाऱ्या एका वनगायीनं बाईकला धडक दिली. बाईकचा वेग जास्त असल्यामुळे तो तरुण अक्षरश: फुटबॉलसारखा हवेत उडाला आणि रस्त्याच्या कडेला जाऊन पडला. दरम्यान वनगायीचं शिंग त्याच्या छातीत घुसलं. त्यामुळे तो जबरदस्त जखमी झाला होता. दरम्यान आसपासच्या लोकांनी त्याला जवळच्या रुग्णालयात भरती केलं. पण उपचार सुरू होण्यापूर्वीच त्याचा मृत्यू झाला. या दुर्घटनेचा व्हायरल होणारा व्हिडीओ पाहून खरंच तुमच्याही अंगावर काटा येईल.
गायीचा सुद्धा जागीच मृत्यू
ही घटना रस्त्यावरील CCTV कॅमेऱ्यात कैद झाली. अन् आता हा व्हिडीओ सोशल मीडियावर व्हायरल होत आहे. मीडिया रिपोर्टनुसार धडक देणाऱ्या त्या वनगायीचा देखील मृत्यू झाला. तरुणासोबत ती सुद्धा हवेत उडाली आणि खाली पडताना तिची मान मोडली. परिणामी जागीच तिचासुद्धा मृत्यू झाला. हा व्हिडीओ १ लाख ५४ हजारांपेक्षा अधिक नेटकऱ्यांनी पाहिला असून सर्वांनीच या तरुणाला श्रद्धांजली वाहिली आहे. तसेच गाडी चालवताना थोडी सावधगीरी बाळगा असा सल्ला देखील काही जण देताना दिसत आहेत
