नवचैतन्य टाईम्स मुंबई प्रतिनिधी(एस.डी.कदम)लोकप्रिय मराठी अभिनेत्री मानसी नाईक हिने आपल्या अभिनयाने प्रेक्षकांच्या मनावर राज्य केलं. तिने अभिनयासोबतच आपल्या नृत्याने सगळ्यांची मनं जिंकून घेतली. तिचं 'वाट बघतोय रिक्षावाला' आणि 'बाई वाड्यावर या' ही गाणी प्रचंड गाजली. मानसी तिच्या व्यावसायिक आयुष्यासोबत तिच्या वैयक्तिक आयुष्यामुळेही चाहत्यांमध्ये चर्चेत राहिली. २०२३ मध्ये मानसीचा घटस्फोट झाला. तिने बॉक्सर प्रदीप खरेराशी लग्नगाठ बांधली. त्यानंतर मात्र वर्षभरातच त्यांचा घटस्फोट झाला. महिन्याभरापूर्वीच मानसी कायदेशीररित्या या लग्नातून मोकळी झाली होती. एक व्हिडिओ शेअर करत तिने ही बातमी चाहत्यांना दिली होती. आता मात्र ती पुन्हा एकदा बोहोल्यावर चढणार असल्याच्या चर्चा सुरू झाल्या आहेत. कारण ठरलाय तिने शेअर केलेला एक फोटो.
मानसीने काही दिवसांपूर्वी दिलेल्या एका मुलाखतीत तिने प्रेमाची जाहीर कबुली दिली होती. आपण पुन्हा प्रेमात पडल्याचं तिने म्हटलं होतं. मानसी तिच्या वाढदिवशी पॅरिसला पोहोचली होती. अभिनेत्रीचे हे फोटो सोशल मीडियावर व्हायरल झाले होते. तिथे तिच्यासोबत नक्की कोण होतं असा प्रश्न चाहत्यांना पडला होता. याविषयी लवकरच खुलासा करणार असल्याचं मानसीने म्हटलं होतं. आता मानसीसोबत पॅरिसमध्ये नक्की कोण होतं त्याचा फोटो समोर आला आहे. नुकतंच मानसीने या व्यक्तीसोबतचा फोटो शेअर केला आहे. मानसी पॅरिसमध्ये राहुल खिसमत्रो या व्यक्तीसोबत सुट्ट्यांचा आनंद घेत होती. राहुलने आयफेल टॉवरसमोर मानसीसोबतचा फोटो सोशल मीडियावर शेअर केला आहे. या फोटोला त्यानं ‘माझं प्रेम’ असं म्हटलं आहे. राहुल एक अंतराळ शास्त्रज्ञ आहे.
तो काही काळ भारतात तर काही काळ जर्मनीतील बर्लिन येथे राहतो. तो एक लेखकही आहे त्याने 'थेअरी ऑफ क्रिएटर' हे पुस्तकही लिहिलं आहे. तो अखेड फाउंडेशनशी जोडलेला आहे. यासोबतच तो युरोपियन विधानसभेतील युथ अँबॅसिडर देखील आहे. त्यानेही मानसीसोबतचा फोटो त्याच्या इंस्टाग्रामला शेअर केला आहे. त्यामुळे आता मानसी लग्न कधी करते याकडे सगळ्यांचं लक्ष लागलं आहे. तर मुलाखतीत तिने आपण जर्मनीला शिफ्ट होणार असल्याचं देखील म्हटलं होतं.
