नवचैतन्य टाईम्स मुंबई प्रतिनिधी(नेहाल हसन)-एखाद्या गाजलेल्या सिनेमाचा सिक्वेल येत असेल तर त्यामध्ये आधीच्या सिनेमातले कलाकार असावेत अशी त्यांच्या चाहत्यांची इच्छा असते. असंच काहीसं झालंय अभिनेत्री विद्या बालनबाबत. 'भुलभुलैया'मध्ये विद्यानं साकारलेली मोंजोलिका प्रेक्षकांना भावली होती. पण 'भुलभुलैया २' मध्ये विद्या नसल्यानं प्रेक्षकांनी नाराजी व्यक्त केली होती. आता या सिनेमाच्या तिसऱ्या भागात तिनं असावं अशी चाहत्यांची इच्छा होती.
‘भुलभुलैया’ या चित्रपटातल्या मोंजोलिकाचं भूत प्रेक्षकांच्या मानगुटीवर बसण्यासाठी पुन्हा एकदा सज्ज होत आहे. मात्र, या वेळी ही मोंजोलिका नेमकी कोण असणार, असा प्रश्न प्रेक्षकांना पडणार आहे. याचं कारण आगामी ‘भुलभुलैया ३’ या चित्रपटात तीन अभिनेत्रींची वर्णी लागली आहे. कार्तिक आर्यनसह विद्या बालन आणि तृप्ती डिमरीनं या चित्रपटाचं काम सुरू केल्याचं काही दिवसांपूर्वी प्रेक्षकांनी ऐकलं. आता भुतांच्या या खेळात प्रसिद्ध अभिनेत्री माधुरी दीक्षित-नेनेची वर्णी लागल्याचं कळतंय.
गाण्यासाठी खास तयारी
अर्थात, निर्माते-दिग्दर्शकानं तशी अधिकृत घोषणा केलेली नसली, तरी विद्या आणि माधुरी यांच्यात नृत्य जुगलबंदी होणार असल्याची जोरदार चर्चा आहे. विशेष म्हणजे, आधीच्या दोन्ही भागांत गाजलेलं ‘मेरे ढोलना सुन, मेरे प्यार की धून’ अर्थात मोंजोलिकाच्या भाषेतलं ‘आमी जे तोमार’ हे गीत नव्या स्वरूपात चाहत्यांसमोर येणार असल्याची बातमी आहे. या गाण्याच्या चित्रीकरणाची तयारीही सुरू झाली असून पुढच्याच महिन्यात या दोघी त्याचं चित्रीकरण करतील, असंही बोललं जातंय.
१७ वर्षांनी विद्या 'भुलभुलैया'मध्ये
अनीस बझ्मी आणि भूषणकुमार या दिग्दर्शक-निर्माता जोडीनं या तिसऱ्या भागात मनोरंजनाची काही कसर ठेवायची नसल्याचं ठरवलं आहे. या दोघींसह कार्तिक आर्यनही या गाण्यात दिसेल, असं कळतंय. मूळ चित्रपट आल्यानंतर विद्या १७ वर्षांनी पुन्हा या खेळात सहभागी होतेय. दुसऱ्या भागात विद्याच्या जागी तब्बू दिसली. आता तिसऱ्या भागात माधुरी काय कमाल करते, हे लवकरच कळेल!
दरम्यान, आता या दोघींना एकत्र डान्स करताना पाहणं चाहत्यांसाठी पर्वणी ठरणार आहे.
