नवचैतन्य टाईम्स पुणे प्रतिनिधी(रावसाहेब काळे)-बारामती लोकसभा मतदारसंघाच्या निवडणूकीत जे दोन-तीन तालुके महत्वाची भूमिका बजावणार आहेत. त्यामध्ये इंदापूर तालुक्याचा समावेश आहे. मागील निवडणूकीत एकत्र राष्ट्रवादीच्या प्रयत्नातून सुप्रिया सुळेंना निर्णायक आघाडी मिळाली. त्या इंदापूरात सुनेत्रा पवारांना यंदा आघाडी मिळवून देण्यासाठी अजित पवार सरसावले आहेत. भाजप व राष्ट्रवादीतील दरी कमी करण्यासाठी गेल्या अनेक दिवसांपासून कसरती सुरू असतानाच आता शुक्रवारी १९ एप्रिल रोजी इंदापूरच्या भाग्यश्री बंगल्यावर अजितदादांचे कुटुंबिय भोजनासाठी उपस्थित राहणार आहेत.
माजी सहकारमंत्री हर्षवर्धन पाटील यांच्या निमंत्रणावरून अजितदादा, सुनेत्रावहिनी, पार्थ व जय पवार हे भाग्यश्री बंगल्यावर भोजनासाठी उपस्थित राहणार आहेत. यानिमित्ताने इंदापूरच्या वाघ पॅलेसमध्ये प्रमुख पदाधिकाऱ्यांचा संवादही होणार आहे,अशी माहिती सूत्रांनी दिली.
इंदापूर तालुका हा बारामती लोकसभा जिंकण्यासाठी अत्यंत महत्वाचा असून येथे राष्ट्रवादी अजित पवार गटाचा विद्यमान आमदार कार्यरत आहे. मात्र भाजपला बरोबर घेतल्यास येथून क्लिन स्विप मिळू शकते हा कयास अजित पवारांचा आहे. त्यामुळे गेल्या काही दिवसांपासून अजित पवारांची धावपळ सुरू आहे. भाजपच्या कार्यकर्ते, पदाधिकाऱ्यांची समजूत घालण्यासाठी देवेंद्र फडणवीसांमार्फत अजितदादांनी मोठी फिल्डींग लावली होती.
यासाठी देवेंद्र फडणवीस यांनी शर्थीचे प्रयत्न केले. आणि कार्यकर्त्यांची समजूत घालत त्यांच्याकडून महायुतीच्या उमेदवाराला विजयी करण्यासाठी शपथ करवून घेतली. आता या कार्यकर्त्यांना प्रचारात सामावून घेण्यासाठी ज्या कार्यालयात दोन दिवसांपूर्वी शरद पवारांच्या उपस्थितीत अप्पासाहेब जगदाळे यांचा पक्षप्रवेश झाला. त्याच ठिकाणी भाजपच्या कार्यकर्त्यांसमवेत अजित पवारांचा संवाद आयोजित करण्यात आला आहे. आता वाघ पॅलेसपासून ते भाग्यश्री बंगल्यापर्यंतचा हा सुसंवाद बारामतीच्या वाघाचं भाग्य उजळवते का हे पाहणे औत्सुक्याचे ठरणार आहे.
दरम्यान वाघ पॅलेसमधील मेळाव्यानंतर भाग्यश्री बंगल्यावर अजित पवारांचे स्नेहभोजन होणार आहे. इंदापूरातून निर्णायक आघाडी घेण्यासाठी अजित पवारांना हर्षवर्धन पाटलांची गरज आहे. त्यामुळेच ही डिनर डिप्लोमसी असून या डिप्लोमसीतून निवडणूकीत भाग्य उजळणार का हे भाग्यश्री बंगल्यावर ठरेल.
