नवचैतन्य टाईम्स पुणे प्रतिनिधी(रावसाहेब काळे)- मनसेच्या स्थापनेपासूनच बारामती लोकसभा मतदारसंघात हा पक्ष फारशी प्रभावी कामगिरी करू शकलेला नाही. पक्षासोबत असलेल्या तरुणांनाही पक्ष प्रमुखांची बदलणारी धोरणे चक्रावून टाकणारी आहेत. बदलत्या राजकीय स्थितीत मनसे महायुतीसोबत गेलेली असली तरी त्याचा फारसा परिणाम बारामती लोकसभा मतदारसंघात होणार नाही. महायुतीला ना फारसा फायदा, महाविकास आघाडीला ना फारसा तोटा अशी स्थिती येथे राहिल.
बारामती लोकसभा मतदारसंघातील खडकवासला व पुण्यालगतच्या काही परिसरात मनसेची थोडी बहुत ताकद आहे. बारामतीत ॲड. सुधीर पाटसकर यांच्या रुपाने गेली अनेक वर्षे प्रदेश उपाध्यक्षपद बारामतीला मिळालेले आहे. परंतु पक्षाचा विस्तार ग्रामीण भागात म्हणावा तसा झालेला नाही. पक्ष संघटना बांधणीकडे नेत्यांचे, पदाधिकाऱ्यांचे दुर्लक्षच झाल्याचे आजवर दिसून आले आहे. एकेकाळी भाजपची या मतदारसंघात फारच नगण्य ताकद होती. परंतु त्यांनी प्रयत्नपूर्वक आपली ताकद वाढवली. जिल्ह्यातील शिवसेनाही आता विभागली आहे. उद्धव ठाकरे गटासह शिंदे गटाकडे निम्मे-निम्मे संख्याबळ आहे. त्या तुलनेत मनसेची फारशी ताकद दिसून येत नाही.
गुढीपाडव्याला घेतलेल्या मेळाव्यात राज ठाकरे यांनी महायुतीसोबत जाण्याची भूमिका स्पष्ट केली. त्याचा बारामती लोकसभा मतदारसंघात किती फरक पडेल याचा कानोसा घेतला असता नागरिकांनी तिखट प्रतिक्रिया दिल्या. ते एकदा इकडे एकदा तिकडे असतात. लाव रे तो व्हीडिओ असे म्हणत ते मोदी शहांवर टीका करत होते. आता नेमके काय झाले की त्यांना महायुतीला पाठींबा द्यावा लागला, या शब्दात नागरिकांनी प्रतिक्रिया दिल्या. महायुतीमध्ये मनसे सहभागी होण्याचा बारामती लोकसभा मतदारसंघात ना महायुतीला फारसा फायदा होणार, ना महाविकास आघाडीचा फारसा तोटा, अशी स्थिती सध्या येथे दिसून येत आहे.
