नवचैतन्य टाईम्स नागपूर प्रतिनिधी(संजय फरांदे) नागपूरच्या एमआयडीसी पोलीस ठाण्यांतर्गत असलेल्या वानाडोंगरी परिसरातील एका ओयो हॉटेलमध्ये प्रेयसीसह तिच्या मुलाची हत्या करून गळफास घेऊन आत्महत्या केल्याची हृदयद्रावक घटना समोर आली आहे. अनैतिक संबंधातून होणारे वाद आणि कलह याला कंटाळून हे पाऊल उचलल्याचे सांगण्यात येत आहे. ही हृदयद्रावक घटना एमआयडीसी पोलीस ठाण्यांतर्गत असलेल्या वानाडोंगरी परिसरामध्ये असलेल्या ओयो हॉटेलमध्ये उघडकीस आली आहे.
इसासनी येथील रहिवासी सचिन राऊत याने प्रेयसी नाजनीन आणि २ वर्षाच्या मुलाची निर्घृण हत्या केली. त्यानंतर त्याने गळफास घेत आत्महत्या केली. पोलिसांनी दिलेल्या माहितीनुसार, सचिन आणि नाजनीनचे आधीच लग्न झाले आहे. सचिन हा ड्रायव्हर म्हणून काम करायचा. ते दोघे २०२२ मध्ये मध्य प्रदेशात एका लग्नात भेटले आणि नंतर प्रेमात पडले. त्यानंतर नाजनीनही नागपुरात आली आणि सचिनसोबत राहू लागली. पुढे त्यांना एक मुलगाही झाला. सचिनने नाजनीनला वैशाली नगरमध्ये वेगळे घर दिले होते. सचिनची रोज नाजनीनच्या घरी ये - जा सुरू होती.
सचिनची पत्नी आणि त्याचा कुटुंबीयांनाही त्यांच्या नात्याची माहिती मिळाली. तर गेल्या काही दिवसांपासून सचिन आणि नाजनीनमध्ये पैशांवरून वाद सुरू होता. एवढेच नाही तर नाजनीनचे अन्य कोणाशी तरी संबंध असल्याचा संशयही सचिनला होता. यावरून दोघांमध्ये वाद होऊ लागले. या घटनेच्या एक दिवस आधी दोघांनी वेगळे होण्याचा निर्णय घेतला होता. कागदावर एक करारही तयार केला होता. ज्यामध्ये मुलाला सचिनकडे ठेवल्याची चर्चा होती. मात्र शनिवारी हा वाद कशावरून झाला हे स्पष्ट झालेले नाही.
पूर्ण नियोजनानुसार सचिन आपल्या प्रेयसी आणि मुलासह हॉटेलमध्ये आला. नाजनीनचा हातोडीने वार करून खून केल्यानंतर त्याने मुलालाही विष देऊन ठार केले. नंतर गळफास घेत आत्महत्या केली. एका वाटसरूने हॉटेलच्या खिडकीतून एक व्यक्ती लटकताना पाहिली. त्यानंतर त्यांनी याची माहिती हॉटेल कर्मचाऱ्यांना घटनेची माहिती दिली. त्यांनी एमआयडीसी पोलिसांना या घटनेची माहिती दिली. तेव्हा ही घटना उघडकीस आली.