नवचैतन्य टाईम्स धुळे (प्रतिनिधी)- शनिवारी दुपारच्या सुमारास धुळे शहरातील नकाने रस्त्यावर कौटुंबिक भांडणातून पतीने आपल्या पत्नीची गळा चिरुन हत्या केल्याची धक्कादायक घटना समोर आली आहे. या घटनेनंतर धुळे शहरात एकच खळबळ उडाली आहे.
घरगुती वादातून पतीने पत्नीला रस्त्यात गाठून तिची हत्या केल्याची घटना शनिवारी दुपारी नकाणे रोडवरील छत्रपती हॉस्पिटलच्या पाठीमागे घडली आहे. दिवसाढवळ्या झालेल्या या घटनेने शहरात खळबळ उडाली आहे. घटनेची माहिती मिळताच पोलिसांनी घटनास्थळी धाव घेतली होती.
धुळे शहरातील फुले कॉलनीत राहणाऱ्या अनिता हिरा बैसाणे (अंदाजे वय ४०) या धुणी-भांडी करतात. त्यांच्यात आणि पती हिरा वाल्मिक बैसाणे (४९) यांच्यात नेहमी कौटुंबिक वाद होत होते. आज दुपारी अनिता बैसाणे या काम करुन घरी जात असताना पती हिरा बैसाणे यांनी त्यांना पांझरा नदी किनारच्या समांतर रस्त्यावर असलेल्या छत्रपती हॉस्पिटलच्या पाठीमागे अडवलं. हिरा बैसाणेने पत्नी अनिताला मारहाण करुन चाकूने त्यांचा गळा चिरला. यात अनिता बैसाणे यांचा जागीच मृत्यू झाला.
घटनेनंतर हिरा बैसाणे याने पळ काढला. त्यानंतर तो जवळील एका मंदिरात लपून बसला होता. घटनेची माहिती मिळताच पश्चिम देवपूर पोलिसांनी त्याला ताब्यात घेतलं. घटनास्थळी डीवायएसपी एस.ऋषिकेश रेड्डी, पश्चिम देवपूरचे पीआय सुरेश शिरसाठ, एलसीबीचे एपीआय श्रीकांत पारधी आणि पथकाने धाव घेतली होती.
