नवचैतन्य टाईम्स सातारा जिल्हा प्रतिनिधी(डॉ.अरुण राजपुरे)-सन २०१९मध्ये विधानसभा निवडणुकीबरोबरच सातारा लोकसभा मदतारसंघाची पोटनिवडणूक झाली. भर पावसात सभा घेऊन राष्ट्रवादी काँग्रेसचे अध्यक्ष शरद पवार यांनी खासदार उदयनराजे भोसले यांच्याकडून विजयश्री खेचून आणली. हा इतिहास फार जुना नाही. यंदा पुन्हा उदयनराजे भारतीय जनता पक्षाकडून निवडणुकीच्या रिंगणात आहेत. त्यांच्याविरोधात राष्ट्रवादी काँग्रेस शरदचंद्र पवार गटाकडून माजी मंत्री शशिकांत शिंदे निवडणूक लढवीत आहेत. एकूण १६ उमेदवार रिंगणात आहेत.
महायुती आणि महाविकास आघाडी या दोन्ही राजकीय आघाड्यांकडून उमेदवार निश्चितीसाठी बराच वेळ लावला गेला. आपल्यालाच उमेदवारी मिळावी, यासाठी खासदार उदयनराजे भोसले पाच दिवस दिल्लीत तळ ठोकून होते. तेथून परतल्यानंतर त्यांनी कार्यकर्त्यांना कामाला लागण्याचा आदेश दिला. तरीही, उमेदवारीची अधिकृत घोषणा होण्यासाठी पुढे बरेच दिवस लागले. त्यातूनच साताऱ्याच्या जागेसाठी किती टोकाची रस्सीखेच महायुतीमध्ये होती, याची कल्पना येऊ शकेल. त्या तुलनेत ‘राष्ट्रवादी’ने शिंदे यांची उमेदवारी लवकर जाहीर करून आघाडी घेतली.
खासदार उदयनराजे यांची जनमानसावर पकड आहे. त्यांच्या वैभवशाली कौटुंबिक वारसा, ‘रॉबिनहूड’ प्रतिमा या त्यांच्या जमेच्या बाजू आहेत. मात्र, त्याच वेळी त्यांच्या कारकिर्दीत फारशी विकासकामे झाली नाहीत, अशी नाराजीही ऐकायला मिळते. शशिकांत शिंदे यांचीही प्रतिमा धडाडीचा नेता अशी आहे. दोघांनाही मतदारसंघाची पूर्ण माहिती आहे. दोन्ही नेते मतदारांना पूर्ण परिचित आहेत. त्यामुळेच साताऱ्यातील लढत यंदा दुरंगी असली, तरी तुल्यबळही आहे.
सातारा लोकसभा मतदारसंघात सातारा-जावली, कोरेगावचा काही भाग, कराड दक्षिण, कराड उत्तर, पाटण, वाई हे विधानसभा मतदारसंघ येतात. कागदावरचे गणितही दोन्ही उमेदवारांसाठी समसमान असल्याचे दिसते. साताऱ्यात उदयनराजेंचे चुलत बंधू शिवेंद्रराजे भोसले (भाजप), कोरेगावमध्ये महेश शिंदे (शिवसेना शिंदे गट), वाईमध्ये मकरंद पाटील (राष्ट्रवादी काँग्रेस अजित पवार गट) आणि पाटणमध्ये शंभुराज देसाई (शिवसेना शिंदे गट) हे आमदार आहेत. कराड उत्तरमध्ये बाळासाहेब पाटील (राष्ट्रवादी काँग्रेस शरदचंद्र पवार) आणि कराड दक्षिणमध्ये माजी मुख्यमंत्री पृथ्वीराज चव्हाण (काँग्रेस) हे आमदार आहेत. सहापैकी चार मतदारसंघात महायुतीचे आमदार असले, तरी हे सर्व जण एकदिलाने उदयनराजेंच्या पाठीशी उभे राहून त्यांना मताधिक्य देतीलच, याची खात्री देता येत नाही. त्याउलट, बाळासाहेब पाटील आणि पृथ्वीराज चव्हाण यांच्याकडून शशिकांत शिंदे यांना मताधिक्य मिळण्याची खात्री अधिक आहे. मकरंद पाटील यांचे पत्ते उद्याप उघडायचे आहेत.
राष्ट्रवादी’चा बालेकिल्ला मानल्या समजल्या जाणाऱ्या सातारा जिल्ह्यात अजित पवार आणि शरद पवार या दोन गटांतील कार्यकर्त्यांची कोंडी झाली आहे. ‘कोणता झेंडा घेऊ हाती,’ अशा संभ्रमात कार्यकर्ते आहेत. अजित पवार गटाचे कार्यकर्ते उदयनराजे यांच्या प्रचारात हिरीरीने सहभागी झाल्याचे दिसून येत आहे. आजपर्यंत कराडमधील दोन्ही मतदारसंघ आणि पाटण हे तीन मतदारसंघच सातारा लोकसभेचा खासदार ठरवितात, असा अनुभव आहे. येथून जो उमेदवार सव्वा लाखांपेक्षा जास्त मताधिक्क्य घेतो तोच निवडून येतो. यंदा लढत भाजप विरुद्ध शरद पवारांची राष्ट्रवादी अशी होणार आहे. उदयनराजेंच्या प्रचारासाठी येत्या २९ एप्रिलला पंतप्रधान नरेंद्र मोदी यांची जाहीर सभा आयोजित करण्यात आली आहे. याशिवाय केंद्रीय गृहमंत्री अमित शहा, मुख्यमंत्री एकनाथ शिंदे, उपमुख्यमंत्री देवेंद्र फडणवीस अजित पवार, केंद्रीय मंत्री स्मृती इराणी, उत्तर प्रदेशचे मुख्यमंत्री योगी आदित्यनाथ यांच्या सभा होणार आहेत. ‘राष्ट्रवादी’कडून शरद पवार तीन सभा घेणार असून, माजी मुख्यमंत्री उद्धव ठाकरे आणि आदित्य ठाकरेसुद्धा सभा घेणार आहेत. स्थानिक पातळीवर कार्यकर्ते नेत्यांचा आदेश किती पाळतात आणि महायुती म्हणून किंवा महाविकास आघाडी म्हणून कितपत काम करणार यावर निकाल अवलंबून असेल.
खालील मुद्दे राहणार चर्चेत
मराठा आरक्षण
औद्योगिक वसाहतीत नवे उद्योग न येणे
- बेरोजगारांना युवकांना पुणे-मुंबईची वाट धरावी लागणे
- दुष्काळी परिस्थितीकडे सरकार व प्रशासनाचे दुर्लक्ष
- आजवरच्या खासदारांची निष्क्रियता
२०१९मधील चित्र
श्रीनिवास पाटील (राष्ट्रवादी काँग्रेस) - ६,३६,६२०
उदयनराजे भोसले (भाजप) - ५,४८,९०३
सुशीलकुमार भोसेकर (अपक्ष) - २६,४०७
चंद्रकांत खंडाईत (वंचित बहुजन आघाडी) - १७,२०३
विजयी उमेदवारांचे मताधिक्य : ८७,७१७
एकूण मतदार - ९ लाख ७५ हजार ७०९
पुरुष - ५ लाख १९ हजार १४८
महिला - ४ लाख ५६ हजार ५६१
