नवचैतन्य टाईम्स सातारा जिल्हा प्रतिनिधी( डॉ.अरुण राजपुरे)-महायुतीकडून सातारा लोकसभेसाठी उदयनराजे भोसले यांना उमेदवारी देण्यात आली असून त्यासाठी त्यांनी उमेदवारी अर्जही दाखल केला. या अर्जासोबत त्यांनी प्रतिज्ञापत्रही सादर केलं. यामध्ये त्यांनी त्यांच्या संपत्तीची माहिती दिली आहे. त्यानुसार, उदयनराजे हे अब्जाधीश आहेत. त्यांच्याकडे १६ कोटी ८५ लाख ७७ हजार ०४८ रुपये इतकी जंगम तर २४ कोटी २५ लाख २९ हजार इतकी स्थावर मालमत्ता आहे. २०१९ मध्ये त्यांची संपत्ती १ अब्ज ५७ कोटी २५ लाख रुपये इतकी होती. गेल्या ५ वर्षात त्यांच्या संपत्तीत तब्बल १५ कोटी ६९ लाख ४९ हजार रुपयांची वाढ झाली आहे. सध्या त्यांच्याकडे १ अब्ज ७२ कोटी ९४ लाख ४९ हजार रुपयांची संपत्ती आहे.
वारशाने १ अब्ज ७२ कोटी ९४ लाख ४९ हजार रुपयांची संपत्तीउदयनराजेंना वारशानेच १ अब्ज ७२ कोटी ९४ लाख ४९ हजार रुपयांची संपत्ती मिळाली आहे. उदयनराजे यांनी त्यांच्या प्रतिज्ञापत्रात २०२२-२३ मध्ये एक कोटी ११ लाख ५० हजार रुपयांचे करप्राप्त उत्पन्न दाखवलं आहे. तर पत्नी दमयंतीराजे यांनी २० लाख ६७ हजार ७२४ रुपयांचे करप्राप्त उत्पन्न दाखवलं आहे. प्रतिज्ञापत्रानुसार, त्यांच्या विविध बॅंकांमध्ये २ कोटी ६३ लाख ६३ हजार ३१८ रुपयांची रक्कम शिल्लक आहे.
आलिशान गाड्या, ३६ किलो सोनं
उदयनराजेंकडे ट्रॅक्टरपासून ते ऑडी, मर्सिडिजपर्यंतच्या गाड्या आहेत. त्यांच्याकडे असलेल्या सहा आलिशान गाड्यांमध्ये ऑडी, मर्सिडिज बेन्ज, फॉर्च्युनर, मारुती जिप्सी, दोन ट्रक्टर व एस क्रॉस गाडीचा समावेश आहे. ज्यांची किंमत १ कोटी ९० लाख ०५ हजार रुपये आहे. त्यांच्यावर २ कोटी ४४ लाख ६३ हजारांचं वैयक्तिक कर्जही आहे. तर, त्यांच्याकडे ३६ किलो सोनं आहे, ज्याची किंमत २ कोटी, ६० लाख ७४ हजार रुपये इतकी आहे. तर, पत्नी दमयंतीराजेंकडे ३५ लाख ६४ हजारांचे दागिने आहेत.
शेतजमिनी, वाणिज्य इमारती अन् १९ कोटींचा बंगला
उदयनराजेंकडे १ अब्ज २७ कोटी ९९ लाख ३० हजार रुपये किमतीची शेतजमीन, तसेच २० कोटी १४ लाखांची बिगरशेती जमीन आहे. २९ लाख ०१ हजारांच्या वाणिज्य इमारती, १९ कोटी ९३ लाख १२ हजारांची निवासी इमारत आहे.
