नवचैतन्य टाईम्स मुंबई प्रतिनिधी(एस.डी.कदम)-एसटी बसने दुचाकीला धडक देत भीषण अपघात झाल्याचं समोर आलं आहे. मनोर इथे हा अपघात घडला. या अपघातात दुचाकीस्वार असलेल्या कुटुंबातील आईचा मृत्यू झाला असून एक वर्षाचा चिमुकला गंभीररित्या जखमी झाला आहे. सोनल लोखंडे (वय ३०)असं अपघातात मृत्यू झालेल्या महिलेचं नाव आहे. अपघाताची ही संपूर्ण घटना सीसीटीव्ही कॅमेरात कैद झाली आहे.
सोनल लोखंडे या आधार कार्डच्या एका कामानिमित्त पालघर तालुक्यातील मनोर इथे त्यांचे पती आणि दोन मुलांसोबत दुचाकीवरून येत होत्या. दुचाकीवरून जात असताना पालघरच्या दिशेने जाणाऱ्या पालघर - विक्रमगड एसटी बसने त्यांच्या दुचाकीला बाजूने जाताना जोरदार धडक दिल्याने भीषण अपघात घडला. सोमवारी साडेअकरा वाजताच्या सुमारास मनोर बाजारपेठ परिसरात हा भीषण अपघात घडला आहे. या अपघातात दुचाकीस्वार सर्वजण दुचाकीवरून खाली पडले. अपघातात सोनल लोखंडे आणि त्यांचा एक वर्षाचा मुलगा एसटी बसच्या मागच्या टायरखाली आल्याने गंभीररित्या जखमी झाले.
अपघातातील जखमींना तातडीने मनोर येथील ग्रामीण रुग्णालयात उपचारासाठी दाखल करण्यात आले. मात्र उपचारादरम्यान सोनल लोखंडे यांचा मृत्यू झाला आहे. त्यांचा एक वर्षाचा मुलगा तनिष लोखंडे हा गंभीररित्या जखमी झाल्याने त्याला पुढील उपचारासाठी सिल्वासा येथील रुग्णालयात हलविण्यात आले आहे.
अपघात मृत सोनल लोखंडे या पालघर तालुक्यातील गोवाडे -नेटाळी ग्रामपंचायतच्या सरपंच होत्या. मनोर येथे एसटी बस आणि दुचाकीच्या घडलेल्या या भीषण अपघाताचा व्हिडिओ परिसरातील एका दुकानाच्या सीसीटीव्ही कॅमेऱ्यात कैद झाला आहे. सीसीटीव्हीमध्ये बसने बाईकला दिलेल्या धडकेत महिला दुचाकीवरुन मागे पडल्याचं दिसत असून बसचं मागचं चाक महिलेच्या अंगावरुन गेलं आणि यात ती गंभीर जखमी झाली होती. रुग्णालयात दाखल केल्यानंतर उपचारादरम्यान तिचा मृत्यू झाला.
