नवचैतन्य टाईम्स मुंबई प्रतिनिधी(नेहाल हसन) विचारधारा आणि पक्ष एकच असतो. मी नेहमी शरद पवार यांच्या विचारधारेवरच काम करत आलोय. त्यांचे नेतृत्व मी कधीही सोडलेले नाही, आजही माझ्या कार्यालयात पवारसाहेबांचा फोटो आहे. पवारसाहेबांचे स्थान माझ्या हृदयात आहे ते कुणीही काढू शकत नाही. साहेबांच्या मंचावरून दुसरीकडे जाणं एवढं सोपं आहे का? आम्हा सर्वांचे सर्वेसर्वा साहेबच असतील. ते देतील तो आदेश मान्य असेल, असे सांगत आमदार निलेश लंके यांनी अजित पवार गटाची अलगद साथ सोडून शरद पवार यांच्या गटात उडी मारली. त्याचबरोबर आगामी लोकसभा निवडणुकीत नगरच्या जागेवरून तुतारी चिन्हावरच लढू, अशी अप्रत्यक्षपणे घोषणाच त्यांनी केली. दुसरीकडे मी निलेश लंके यांचे स्वागत करतो. आवश्यकता लाभली की आम्ही त्यांच्या मागे उभे राहू, असे सांगत त्यांच्या उमेदवारीचे संकेतही ज्येष्ठ नेते शरद पवार यांनी दिले.
अहमदनगर दक्षिण मतदारसंघात सुजय विखे यांना उमेदवारी जाहीर झाल्यानंतर गेल्या दोन वर्षापासून लोकसभा निवडणुकीची तयारी करणारे निलेश लंके काय भूमिका घेणार याकडे सगळ्यांचे लक्ष लागले होते. अखेर गुरुवारी सायंकाळी पाच वाजता त्यांनी पुण्यातील राष्ट्रवादी काँग्रेस पक्ष कार्यालयात येऊन ज्येष्ठ नेते शरद पवार यांची भेट घेतली. या भेटीदरम्यान आणि खासगी चर्चेदरम्यान प्रदेशाध्यक्ष जयंत पाटील तिथे उपस्थित होते. त्यानंतर कोव्हिड काळातील लंके यांना आलेल्या अनुभवावर आधारित 'मी अनुभवलेला कोव्हिड' या पुस्तकाचे अनावरण शरद पवार यांच्या हस्ते संपन्न झाले. तत्पूर्वी झालेल्या पत्रकार परिषदेत पत्रकारांच्या अवघड प्रश्नांना उत्तरे देताना त्यांची धांदल उडाली तरीही त्यांनी खुबीने 'कोड्यात' उत्तरे दिली.
'मी कुठे गेलोच नव्हतो'
निलेश लंके म्हणाले, आज पवारसाहेबांची पुस्तक प्रकाशनाच्या निमित्ताने भेट घेतली. देशाच्या विविध घडामोडीत पवारसाहेबांचा सिंहाचा वाटा असतो. कोव्हिड काळात त्यांच्या नावानेच मी कोव्हिड सेंटर सुरू केले होते. आज त्याच अनुभवांचं कथन मी पुस्तकात केले आहे. मी नेहमीच शरद पवार यांच्या विचारधारेवरच काम करत आलोय. त्यांचे नेतृत्व मी कधीही सोडलेले नाही, पवारसाहेबांचे स्थान माझ्या हृदयात आहे. ते कुणीही काढू शकत नाही. साहेबांच्या मंचावरून दुसरीकडे जाणं एवढं सोपं आहे का? असे म्हणत 'मी कुठे गेलोच नव्हतो' अशी बतावणीच त्यांनी पत्रकार परिषदेत केली.
साहेब देतील तो आदेश मान्य
शरद पवार यांच्यासोबत खासदारकी आणि इतर निवडणुकीची आज चर्चा केली नाही. माझे सगळे नेते मंडळी इथे बसलेले आहेत. मी स्वत:ला कार्यकर्ता समजतो. त्यांच्यासमोर सुसंस्कृत कार्यकर्त्याने तशी चर्चा करणे योग्य नाही. पण साहेब देतील तो आदेश मला मान्य असेल, असे सांगून लंके यांनी लोकसभा निवडणूक तुतारी चिन्हावरच लढवणार, असे अप्रत्यक्षरित्या सांगितले.
पवारांकडून लंकेंची 'संभाव्य अडचण' दूर
तुम्ही अजित पवार गटात आहात की शरद पवार यांच्यासोबत आहात हे स्पष्टपणे सांगा असा पत्रकारांनी आग्रह धरल्यानंतर शरद पवार यांनी हातानेच इशारा करत 'त्याची काही गरज नाही' म्हणत लंके यांची 'संभाव्य अडचण' दूर केली.
शरद पवार जेव्हा पत्रकारांची फिरकी घेतात
निलेश लंके येत्या काळात अमोल कोल्हे-सुप्रिया सुळे यांच्यासोबत दिल्लीत दिसतील की जयंत पाटील यांच्यासोबत मुंबईत दिसतील, असा हलका फुलका प्रश्न शरद पवार यांना पत्रकारांनी विचारला. त्यावर शरद पवार यांनीही मिश्किल उत्तर देत इथे दुष्काळ पडलाय, ते पारनेरमध्येच दिसतील, असे म्हणत पत्रकारांचीच फिरकी घेतली.
