नवचैतन्य टाईम्स मुंबई प्रतिनिधी(नेहाल हसन) -भाजपने २४ मार्च रोजी १११ उमेदवारांची पाचवी यादी जाहीर केली. या पाचव्या यादीमध्ये बॉलिवूड अभिनेत्री कंगना रणौतचं नाव असून तिला लोकसभेसाठी उमेदवारी देण्यात आली आहे. अभिनेत्री कंगनाला हिमाचलमधील मंडीमधून निवडणुकीच्या रिंगणात उतरवण्यात आलं आहे. कंगनाला उमेदवारी देण्यात आल्यानंतर काँग्रेसच्या प्रवत्या सुप्रिया श्रीनेत यांनी एक पोस्ट शेअर करत कंगनावर निशाणा साधत वादग्रस्त, आक्षेपार्ह पोस्ट शेअर केली होती. पण काही वेळातच त्यांनी कंगनाबद्दल केलेली पोस्ट डिलीट केली. पण या पोस्टचा फोटो प्रसार माध्यमांवर व्हायरल झाला आहे.
कंगनाचा अतिशय बोल्ड फोटो पोस्ट करुन, कोणी सांगेल का बाजारात काय भाव चालू आहे? अशा आशयाची आक्षेपार्ह इन्स्टाग्राम पोस्ट काँग्रेसच्या प्रवत्या सुप्रिया श्रीनेत यांनी केली होती. ही पोस्ट शेअर केल्यानंतर त्यांनी काही वेळात पोस्ट डिलीटही केली. पण आता या पोस्टचा स्क्रिनशॉट शेअर करत कंगना रणौतने त्यांच्या या प्रश्नाला उत्तर दिलं आहे. कंगनाने इन्स्टाग्रामवरील पोस्टचा फोटो शेअर करत आपली प्रतिक्रिया दिली आहे. तिने ट्विट करत लिहिलंय, 'कलाकार म्हणून मागील २० वर्षांच्या कारकिर्दीत मी सर्व प्रकारच्या महिलांच्या भूमिका केल्या आहेत. क्वीन सिनेमातून एका साध्या-भोळ्या मुलीची भूमिका साकारणं ते धाकड सिनेमातील मोहक गुप्तहेरपर्यंत, 'मणिकर्णिका'मधील देवी ते 'चंद्रमुखी'तील राक्षसी भूमिका, 'रज्जो'मधील शरीर विक्री करणारी महिला ते 'थलाईवी'तील क्रांतिकारक नेत्यापर्यंत अनेक भूमिका केल्या आहेत.'
आपण आपल्या मुलींना पूर्वग्रहाच्या बंधनातून मुक्त केलं पाहिजं. जीवन किंवा परिस्थितीला आव्हान देणाऱ्या सेक्स वर्कर्संना अपशब्द वापरण्यापासून आपण परावृत्त केलं पाहिजे. प्रत्येक स्त्री तिच्या सन्मानास पात्र आहे.' अशा आशयाचं ट्विट करत कंगनाने सुप्रिया श्रीनाते यांना उत्तर दिलं आहे.
पोस्ट डिलीट केल्यानंतर सुप्रिया श्रीनेत यांचं स्पष्टीकरण
काँग्रेस प्रवक्त्या सुप्रिया श्रीनेत यांनी कंगनावर अतिशय वादग्रस्त पोस्ट शेअर केल्यानंतर ती डिलीट करत बॅकफूटवर गेल्या आहेत. कंगनाच्या उत्तरानंतर सुप्रिया यांनी स्पष्टीकरण दिलं आहे. त्यांनी लिहिलंय, माझ्या मेटा अकाऊंटवरुन अर्थात फेसबुक आणि इन्स्टाग्राम अकाऊंटवरुन कोणीतरी अत्यंत घृणास्पद आणि आक्षेपार्ह पोस्ट केली होती. आता ही पोस्ट हटवण्यात आली आहे.
जे लोक मला ओळखतात, ते त्यांना माहित असेल, की मी कोणत्याही महिलेसाठी अशाप्रकारचं विधान कधीही करू शकत नाही. त्याशिवाय एक फेक अकाऊंट आहे, त्या अकाऊंटवरुन माझ्या नावाचा दुरुपयोग केला जात होता. कोणीतरी माझ्या नावाने ट्विटरवरही दुरुपयोग केला आहे. याबाबत मी तक्रारदेखील दाखल केली आहे
