महायुतीच्या जागा वाटपाबाबत मुंबईत चर्चा सुरु आहेत. मुख्यमंत्री एकनाथ शिंदे यांनी शिवसेनेला १३ जागा मिळाव्यात अशी मागणी केल्याची माहिती आहे. दुसरीकडे अजित पवार यांनी ९ जागांची मागणी केल्याची माहिती सूत्रांकडून पुढं आलेली आहे. या पार्श्वभूमीवर अजित पवार यांच्या नेतृत्त्वातील राष्ट्रवादी काँग्रेसची मुंबईत आढावा बैठक सुरु आहे. यामध्ये सातारा आणि माढा लोकसभा मतदारसंघाची चाचपणी केली जाणार आहे. तर दुसरीकडे साताऱ्यात महाविकास आघाडीची बैठक सुरु आहे.आज राष्ट्रवादी काँग्रेसच्या अजित पवार गटाची बैठक मुंबईत होत आहे. उपमुख्यमंत्री अजित पवार यांच्या प्रमुख उपस्थितीत होणाऱ्या या बैठकीला राष्ट्रवादीचे प्रदेशाध्यक्ष सुनील तटकरे, राष्ट्रीय कार्याध्यक्ष प्रफुल्ल पटेल, छगन भुजबळ, धनजंय मुंडे यांच्यासह पदाधिकारी उपस्थित राहणार आहेत. माढा आणि सातारा लोकसभा मतदारसंघाची चाचपणी केली जाणार आहे. बैठकीत मतदारसंघावरील आपला हक्क आणि संभाव्य उमेदवारांबाबतची मते जाणून घेतली जाणार आहेत. बैठकीला सातारा जिल्ह्यातून रामराजे नाईक निंबाळकर, मकरंद पाटील, दिपक चव्हाण, जिल्हाध्यक्ष संजीवराजे नाईक निंबाळकर, कार्याध्यक्ष अमित कदम, जिल्हा बँकेचे अध्यक्ष नितीन पाटील यांच्यासह पदाधिकारी व कार्यकर्ते उपस्थित आहेत. आजच्या बैठकीनंतर राष्ट्रवादीकडे सातारा जागा राहणार की भाजपला जाणार हे स्पष्ट होईल. साताऱ्यातून नितीन पाटील तर माढ्यातून संजीवराजे नाईक निंबाळकर इच्छूक आहेत. भाजपकडून उदयनराजे भोसले देखील साताऱ्याच्या जागेसाठी इच्छूक आहेत.महाविकास आघाडीची साताऱ्यात बैठकसातारा लोकसभा मतदारसंघाच्या निवडणुकीबाबत चर्चा आणि रणनीती ठरवण्यासाठी महाविकास आघाडीतील घटक पक्षांची आणि निमंत्रित प्रतिनिधींच्या उपस्थितीत सातारा जिल्हा काँग्रेस कमिटी येथे बैठक आयोजित करण्यात आली आहे. काँग्रेस नेते माजी मुख्यमंत्री पृथ्वीराज चव्हाण, खासदार श्रीनिवास पाटील, माजी मंत्री सतेज ऊर्फ बंटी पाटील, बाळासाहेब पाटील, शशिकांत शिंदे, शिवसेनेचे उपनेते नितीन बानुगडे पाटील, भारत पाटणकर, लक्ष्मण माने आदी प्रमुख नेते उपस्थित राहणार आहेत.मविआमध्ये राष्ट्रवादी काँग्रेस पार्टी शरदचंद्र पवार पक्ष ही सातारा लोकसभा निवडणूक लढवणार आहे. दुसरीकडे महायुतीत ही जागा कोण लढवणार हे अद्याप स्पष्ट झालेलं नाही.
साताऱ्यातील उमेदवारी वरुन सगळेच 'अॅक्शन मोडवर मविआची साताऱ्यात तर राष्ट्रवादीची मुंबईत बैठक? भाजपही आशावादी
March 06, 2024