सिंहगड रस्त्यावरील गोऱ्हे बुद्रुक येथे तिघांना घेरुन तलवारी व कोयत्याने सपासप वार

नवचैतन्य टाईम्स पुणे प्रतिनिधी(रावसाहेब काळे)पुणे शहरात गुन्हेगारी काही करून थांबत नाहीये. टोळी युद्ध, तसेच संघटीत गुन्हेगारीला आळा बसवण्यासाठी पोलिस आयुक्त कडक कारवाई करत आहेत. परंतु प्रत्येक ठिकाणी नव नवीन गुन्हे घडत आहेत. सिंहगड रस्त्यावरील गोऱ्हे बुद्रुक येथे दहा ते पंधरा गुंडांनी भर रस्त्यात तिघांवर कोयते आणि तलवारींनी वार केल्याची धक्कादायक घटना घडली आहे. तिनही तरुणांना किरकटवाडी फाट्याजवळील खाजगी रुग्णालयात दाखल करण्यात आले असून त्यांच्या पाठीवर, पायांवर, हातांवर आणि कमरेवर खोल जखमा झाल्याची प्राथमिक माहिती मिळाली आहे.

रात्री साडेआठ वाजण्याच्या सुमारास घडलेल्या या घटनेमुळे परिसरात दहशतीचे वातावरण निर्माण झाले असून हल्ला नेमका का करण्यात आला, हे अद्याप स्पष्ट झालेले नाही. ही सर्व घटना सीसीटीव्ही कॅमेऱ्यात कैद झाली आहे.

साडेआठ वाजण्याच्या सुमारास गोऱ्हे बुद्रुक येथील बस स्टॉपजवळ दहा ते पंधरा गुंड हातात तलवारी आणि कोयते घेऊन थांबले होते. दुचाकीवरुन आलेल्या गोऱ्हे बुद्रुक येथील तीन तरुणांवर त्यांनी अचानक हल्ला केला. तिनही तरुण तेथून पळाल्याने थोडक्यात बचावले आहेत. मात्र, मागून हत्याराचे घाव बसल्याने खोल जखमा झाल्या आहेत. हल्लेखोरांनी दुचाकीवरही दगड टाकून मोडतोड केली आहे.

तोंडाला रुमाल बांधून आलेले हल्लेखोर पसार झाले असून अद्याप त्यांची ओळख पटलेली नाही. घटनास्थळी हवेली पोलीस ठाण्याचे अधिकारी व कर्मचारी दाखल झाले होते.