नवचैतन्य टाईम्स पुणे प्रतिनिधी(रावसाहेब काळे) सात वर्षांच्‍या मुलीचा खून करून वडिलांनीही गळफास घेत आत्‍महत्‍या केल्याची घटना गुरूनानकनगर, थेरगाव येथे मंगळवारी ( १९ मार्च) पहाटे उघडकीस आली.नंदिनी भाऊसाहेब बेदरे (वय ७) असे खून झालेल्‍या मुलीचे नाव आहे. तर तिचे वडिल भाऊसाहेब भानुदार बेदरे (वय ४५) यांनी आत्‍महत्‍या केली आहे.
बायकोला घ्यायला गेले नाही
सहायक पोलिस निरीक्षक अर्जुन पवार यांनी दिलेल्‍या माहितीनुसार, भाऊसाहेब यांची पत्‍नी काही कारणानिमित्‍त गावी गेली होती. पहाटे चार वाजताच्‍या सुमारास तिने आपला पती भाऊसाहेब यांना फोन करून आपल्‍याला नेण्‍यासाठी या, असे सांगितले. मात्र, भाऊसाहेब हे आलेच नाहीत. त्‍यामुळे त्‍या स्‍वतः घरी आल्‍या. दरवाजा ठोठावल्‍यानंतर त्‍यांच्‍या १४ वर्षांच्‍या मुलाने दरवाजा उघडला. त्‍यावेळी त्‍याच्‍या आईने वडील कुठे आहेत. मला ते न्‍यायला का आले नाहीत, याबाबत विचारणा केली. यावेळी वडील घरात असल्‍याचे मुलाने सांगितले.
खोलीत पती गळफास घेतलेला दिसला अन् मुलगी...
त्‍यानंतर भाऊसाहेब यांच्‍या पत्‍नीने घरातील त्‍यांच्‍या खोलीत जाऊन पाहिले असता पतीने गळफास घेऊन आत्‍महत्‍या केल्‍याचे दिसून आले. त्‍यानंतर तिने मुलीच्‍या डोक्‍यावरील चादर उघडून पाहिली असता तिचाही मृत्यू झाल्याचं दिसलं. हे पाहताच भाऊसाहेब यांच्‍या पत्‍नीने हंबरडा फोडला. आरडाओरड ऐकून जमा झालेल्‍या नागरिकांनी त्‍वरीत पोलिसांना पाचारण केले. भाऊसाहेब हे छोटे - छोटे बांधकामाचे ठेके घेत होते. आर्थिक विवंचनेतून आपण आत्‍महत्‍या करीत असल्‍याचे त्‍यांनी आत्‍महत्‍या करण्‍यापूर्वी लिहिलेल्‍या चिठ्‌ठीत म्‍हटले आहे. सध्या वाकड पोलिस या प्रकरणाचा तपास करीत आहेत.
