आगामी लोकसभा निवडणुकीसाठी भाजपने जोरदार कंबर कसली आहे. त्यामुळे लोकसभेत पंतप्रधान मोदी यांच्या नेतृत्वाखील विजयची हॅटट्रिक करण्यास भाजप उत्सुक आहे. यासाठी काही खासदारांबाबत पदाधिकाऱ्यांमध्ये नाराजी असल्याने भाजप या खासदारांचा पत्ता कापण्याची शक्यता आहे.
खान्देशात अनेकजणांना धक्का बसण्याची शक्यता
भाजपने वाढविली विद्यमान खासदारांची धाकधूक
नव्या इच्छुकांकडून उमेदवारीसाठी
डॉ. भारती पवार- डॉ. सुभाष भामरे
प्रविण चौधरी, जळगाव: आगामी लोकसभा निवडणुकीच्या पार्श्वभूमीवर भाजप सध्या अॅक्शन मोडवर आहे. खान्देशातील चारही लोकसभा मतदारसंघात भाजपचे विद्यमान खासदार आहेत. तरीदेखील या खासदारांबाबत स्थानिक पदाधिकाऱ्यांची नाराजी व इतर कारणांमुळे भाजपकडून त्यांचा पत्ता कापला जाण्याच्या चर्चा सुरू झाल्या आहेत.
महायुतीचे पारडे जड वाटत असले तरी अनेक ठिकाणी भाजपकडून विद्यमान खासदारांना बदलण्यासाठी चाचपणी केली जात असल्याचे विश्वसनीय वृत्त आहे. त्यासाठी केंद्रीय स्तरावरून प्रश्नावली देऊन निरीक्षकांना स्थानिक पदाधिकाऱ्यांकडून मते जाणून घेण्यासाठी पाठवले आहे. खान्देशातील जळगाव, रावेर, धुळे व नंदुरबार या चारही लोकसभा मतदारसंघात भाजपचे विद्यमान खासदार असले तरी कुठल्या ना कुठल्या कारणाने पदाधिकाऱ्यांमध्ये त्यांच्याबाबत असलेल्या नाराजीमुळे त्यांना पुन्हा उमेदवारी देण्यासाठी भाजपकडून चाचपणी केली जात आहे. परिणामी, या विद्यमान खासदारांची धाकधूक वाढली आहे, तर नव्या इच्छुकांकडून उमेदवारीसाठी 'फिल्डिंग' लावली जात
उन्मेष पाटलांना पुन्हा संधी?
जळगाव लोकसभा मतदारसंघात २०१९ च्या निवडणुकीत व्हायरल क्लिपमुळे तत्कालीन विद्यमान खासदार ए. टी. पाटील यांची उमेदवारी काढून माजी आमदार स्मिता वाघ यांना उमेदवारी अर्ज भरण्यास सांगण्यात आला. मात्र, एकाच रात्रीतून निर्णय फिरवत भाजपने उन्मेष पाटील पाटील यांचे नाव निश्चित केले. विशेष म्हणजे, उन्मेष पाटील निवडूनही आले. ५ वर्षांत त्यांनी केलेले काम समाधानकारक असले तरी त्यांचे जिल्ह्यातील भाजप नेत्यांशी फारसे सख्य नसल्याने तसेच पदाधिकाऱ्यांमधील नाराजीमुळे त्यांचे तिकीट कापले जाण्याची चर्चा आहे. ऐनवेळी डावलल्याची भावना असलेल्या स्मिता वाघ तसेच अॅड. उज्ज्वल निकम यांचे पुतणे रोहित निकम हे यावेळी भाजपकडून इच्छुक आहेत.
रक्षा खडसेंची उमेदवारी अडचणीत
रावेर लोकसभा मतदारसंघात भाजपच्या खासदार रक्षा खडसे दुसऱ्यांदा विजयी झाल्या. रक्षा खडसे यांचे दिल्लीत 'गुडवील' असले तरी भाजप सोडून राष्ट्रवादी काँग्रेसमध्ये गेलेले नेते एकनाथ खडसे यांच्या त्या स्नुषा आहेत. भाजपचे नेते तथा उपमुख्यमंत्री देवेंद्र फडणवीस यांचे एकनाथ खडसे कट्टर विरोधक असल्याने रक्षा खडसे यांची उमेदवारी अडचणीत येवू शकते. रावेरमधून भाजपतर्फे मंत्री गिरीश महाजन यांचे नावही चर्चेत आहे. तसेच दिवंगत खासदार हरिभाऊ जावळे यांचे पुत्र अमोल जावळे व काँग्रेस सोडून भाजपमध्ये आलेल्या डॉ. उल्हास पाटील यांच्या कन्या डॉ. केतकी पाटील देखील येथून इच्छुक आहेत.
डॉ. भामरेंचे तिकीट कापणार?
भाजपचे सुभाष भामरे काँग्रेसच्या कुणाल पाटील यांचा पराभव करीत सन २०१९ मध्ये दुसऱ्यांदा विजयी झाले. डॉ. सुभाष भामरे यांना पुन्हा संधी मिळते की भाकर फिरवली जावून दुसऱ्या उमेदवाराला संधी मिळते. याबाबत तर्कवितर्क लढवले जात आहेत. एकीकडे आमदार जयकुमार रावल आणि नुकतेच भाजपमध्ये आलेले निवृत्त पोलिस अधिकारी प्रताप दिघावकर या दोन नावांची राजकीय वर्तुळात चर्चा सुरू आहे.
हिना गावित यांच्या उमेदवारीवर प्रश्नचिन्ह
हिना गावित या सन २०१९ च्या निवडणुकीत अॅड. के. सी. पाडवी यांचा पराभव करीत दुसऱ्यांदा निवडून आल्या. मात्र, यावेळी त्यांचे मताधिक्य घटून लाखाच्या आत आले. त्या पंतप्रधान मोदींच्या गुडबूकमधील खासदार असल्याचे त्यांचे कार्यकर्ते सांगत असले तरी दुसरीकडे त्यांच्याबाबत पक्षांतर्गत मोठी नाराजी आहे. त्यांची उमेदवारी बदलण्याची शक्यता कमी असली तरी तळोदा येथील राजेश पाडवी, त्यांच्याच घरातील राजेंद्र गावित, भाजपचे ज्येष्ठ नेते सुहास नटावदकर यांच्या कन्या डॉ. समिधा नटावदकर आणि अॅड. कुंवरसिंग वळवी यांचे पुत्र डॉ. विशाल वळवी हेदेखील उमेदवारीसाठी इच्छुक आहेत.
केंद्रीय मंत्रिमंडळाची बैठक: PM मोदींचे तासभर मार्गदर्शन, लोकसभा निवडणुकीनंतरच्या अजेंड्यावर चर्चा
डॉ. भारती पवारांचे काय?
दिंडोरी लोकसभा मतदारसंघाच्या विद्यमान खासदार तथा केंद्रीय आरोग्य राज्यमंत्री डॉ. भारती पवार यांचा यावेळीही उमेदवारीसाठी जोरदार दावा आहे. मात्र, नुकतेच राधाकृष्ण विखे नाशिकच्या दौऱ्यावर असताना डॉ. पवारांबाबत पक्षातीलच अनेकांकडून तक्रारीचा सूर लावण्यात आला. त्यामुळे डॉ. पवार यांना तिकीट मिळणार का, याबाबत उत्सुकता आहे. परंतु, दुसरीकडे याच मतदारसंघातून सलग तीन वेळा खासदार राहिलेले हरिश्चंद्र चव्हाण यांच्यासह त्यांचे पुत्र समीर चव्हाण यांचे नावही पुढे येत आहे. याशिवाय, आंतरराष्ट्रीय धावपटू कविता राऊत यांच्या नावाचीही जोदर चर्चा सुरू आहे. त्यामुळे यंदा भाजप विद्यमान खासदार डॉ. पवार यांनाच तिकीट देणार की येथेही भाकरी फिरवणार, याबाबत उत्सुकता आहे.
