नवचैतन्य टाईम्स कराड प्रतिनिधी(संतोष पाटील) उपमुख्यमंत्री देवेंद्र फडणवीस यांच्याबध्दल प्रक्षोभक भाषा वापरुन जीवे ठार मारण्याची धमकी देणारी वक्तव्ये असलेल्या व्हिडिओच्या प्रकरणातील मुख्य आरोपी किंचन नवले वय वर्षे ३४ याला वांद्रे येथील महानगर न्यायदंडाधिकारी न्यायालयाने ७ मार्चपर्यंत पोलिस कोठडी सुनावली आहे. त्याचबरोबर हा व्हिडिओ आपल्या 'एक्स' हँडलवरून व्हायरल करत दोन समाजांत तेढ निर्माण करण्याचा प्रयत्न केल्याप्रकरणी आधीपासून अटकेत असलेले राष्ट्रवादी काँग्रेस शरदचंद्र पवार पक्षाचे सोशल मीडिया सेलचे उपाध्यक्ष योगेश सावंत यांनाही न्यायालयाने ७ मार्चपर्यंत पोलिस कोठडी सुनावली आहे.
सावंत यांनी सोशल मीडियावर संबंधित व्हिडिओ पोस्ट केल्यानंतर युवासेनेचे अक्षय पनवेलकर यांनी सांताक्रूझ पोलिसांनी लेखी तक्रार दाखल केली होती. त्याआधारे पोलिसांनी सावंत यांना २९ फेब्रुवारीला अटक केल्यानंतर न्यायालयाने त्यांना कोठडी सुनावली होती. मात्र, गुन्ह्याचा अधिक तपास करण्यासाठी पोलिस कोठडी आवश्यक आहे, असे म्हणत पोलिसांनी पुनर्विलोकन अर्ज दाखल केल्यानंतर न्यायालयाने शनिवारी सावंत यांची पाच दिवसांची पोलिस कोठडी मंजूर केली. पोलिसांकडून मुख्य आरोपी किंचक नवले याचाही शोध सुरू होता. तो वेशांतर करून वेगवेगळ्या ठिकाणी राहत असल्याचे तपासात समोर आले. अखेर सातारा स्थानिक गुन्हे शाखेच्या मदतीने सांताक्रूझ पोलिसांनी त्याला शनिवारी सातारा येथील सदर बाझार येथून अटक केली. त्यानंतर त्याला मुंबईत आणून वांद्रे न्यायालयात हजर केले. 'अतिमहत्त्वाच्या व्यक्तींना जिवे ठार मारण्याची धमकी कोणाच्या सांगण्यावरून दिली आणि तो व्हिडिओ कोणाच्या सांगण्यावरून अपलोड करत व्हायरल केला, या कटात आणखी कोण सामील आहे, याबाबतच्या चौकशीसाठी दहा दिवसांची पोलिस कोठडी आवश्यक आहे', असे म्हणणे पोलिसांनी न्यायालयासमोर मांडले.
पोलिसांनी सर्वोच्च न्यायालयाच्या मार्गदर्शक तत्त्वांप्रमाणे फौजदारी संहिता प्रक्रियेच्या कलम ४१-अ अन्वये आधी नोटीस देण्याची कायदेशीर प्रक्रिया केलेली नाही', असा युक्तिवाद नवलेतर्फे मांडत ॲड. सतीश मानेशिंदे यांनी पोलिसांच्या विनंतीला तीव्र विरोध दर्शवला. मात्र, 'अटकेमागील कारणे पोलिसांनी दिली असल्याने नोटीसची आवश्यकता नव्हती, हे स्पष्ट होते', असे निरीक्षण नोंदवत न्यायाधीशांनी नवलेची दहा दिवसांच्या ऐवजी पाच दिवसांची पोलिस कोठडी पोलिसांना मंजूर केली.
