नवचैतन्य टाईम्स बारामती प्रतिनिधी(रावसाहेब काळे)- बारामतीत नणंद विरुद्ध भावजय असा लोकसभेचा सामना रंगणार आहे. खासदार सुप्रिया सुळे विरुद्ध सुनेत्रा पवार अशी ही लढत असेल. यंदा एका भावजयीने हात सोडल्याने नणंदेपुढे मोठे आव्हान उभे राहिले असताना दुसरी भावजय त्यांच्या मदतीला धावली आहे. आमदार रोहित पवार यांच्या मातोश्री तथा ॲग्रीकल्चर डेव्हलपमेंट ट्रस्टच्या विश्वस्त सुनंदा पवार या सुळे यांच्या प्रचारात उतरल्या आहेत. इंदापूर तालुक्यातून त्यांनी प्रचार सुरु केला आहे
निवडणूक कोणतीही असो, त्या उमेदवारासाठी संपूर्ण पवार घराणे प्रचारात उतरल्याचे यापूर्वी मतदारांनी पाहिले आहे. यंदा या गोष्टीला पहिल्यांदाच छेद जातो आहे. कुटुंबातील ही लढाई कोणत्याही पवारांसाठी सोपी राहिलेली नाही. परंतु सध्याचे गणित बघितले तर पवारांशी फारत घेतलेल्या उपमुख्यमंत्री अजित पवार यांनी भाषणात सांगितलेल्या बाबींचा प्रत्यय येऊ लागला आहे. त्यांच्या पत्नी व दोन मुलांव्यतिरिक्त पवार कुटुंबातील कोणीही त्यांच्या पाठीशी नसल्याचे दिसून येऊ लागले आहे.
अजित पवार यांचे सख्खे पुतणे युगेंद्र पवार यांनी काकांची साथ सोडत आत्याच्या प्रचाराला वाहून घेतले. पवार कुटुंबात सर्वात प्रथम ते सुळे यांच्यासाठी मैदानात उतरले. आमदार रोहित पवार हे शरद पवार यांच्यासोबत आहेत. परंतु अद्याप त्यांनी बारामतीच्या मैदानात हजेरी लावलेली नाही. त्यांच्या मातोश्री सुनंदा पवार यांनी मात्र आता थेट भूमिका घेत खासदार सुळे यांचा प्रचार सुरु केला आहे. आपल्या जाऊबाई विरोधात त्या आता प्रचार करत असल्याची स्थिती आहे.
सुनंदा पवार या ट्रस्टच्या विश्वस्त आहेत. शारदानगर महाविद्यालयासारखी मोठी संस्था त्यांच्या हाती आहे. शारदा महिला संघाच्या माध्यमातून त्या गेली अनेक वर्षे बारामतीसह राज्यात कार्यरत आहेत. मुली, महिलांसाठी आरोग्यविषयक अनेक उपक्रम त्यांनी राबविले आहेत. भीमथडीच्या माध्यमातून महिला बचत गटांचे संघटन, त्यांना हक्काची बाजारपेठ मिळवून दिली आहे. बारामती, दौंड, पुरंदर व इंदापूर तालुक्यात त्यांचा लोकसंपर्क दांडगा असून त्यांनी आता भेटीगाठींना सुरुवात केली आहे.
दुसरीकडे सुनेत्रा पवार यांच्याकडून त्यांचा मुलगा जय हे बारामतीचे दौरे करत आहेत. आगामी काळात पवार कुटुंबातील अन्य लोक सुप्रिया सुळे यांच्या प्रचारात उतरतील अशी चिन्हे आहेत. त्यामुळे प्रचंड प्रतिष्ठेची असलेली ही निवडणूक तितकीच निर्णायक वळणावर येवून ठेपणार आहे.
शिवतारेंचे आव्हान टिकणार का?
बारामती लोकसभा मतदारसंघात माजी मंत्री विजय शिवतारे यांनी दोन्ही पवारांविरोधात अपक्ष म्हणून निवडणूक रिंगणात उतरणार असल्याचे सांगितले आहे. परंतु त्यांचे हे आव्हान टिकणार का, हा प्रश्न आहे. त्यांनी मुख्यमंत्री एकनाथ शिंदे यांची भेट घेतली आहे. बारामतीत शिवतारे यांनी आव्हान दिले तर ठाण्यात एकनाथ शिंदे यांचे चिरंजीव डॉ. श्रीकांत यांची वाट खडतर करण्याचा प्रयत्न राष्ट्रवादीने केला आहे. डॉ. श्रीकांत शिंदे यांना तेथे राष्ट्रवादीची मदत लागेल. या स्थितीत शिवतारे यांना थोपविण्याचे काम मुख्यमंत्र्यांकडून होईल असे बोलले जात आहे.
