बारामतीत अजित पवारांची धाकधूक वाढली

नवचैतन्य टाईम्स पुणे प्रतिनिधी (रावसाहेब काळे) : बारामतीत महाविकास आघाडीच्या उमेदवार सुप्रिया सुळे विरुद्ध महायुतीच्या उमेदवार सुनेत्रा पवार अशी लढत होणार हे निश्चित झाले असताना माजी मंत्री विजय शिवतारे यांनी अपक्ष म्हणून निवडणूक लढविण्याचा निर्णय घेतला आहे. त्यामुळे महायुतीत मिठाचा खडा पडला असून अजित पवार यांची धाकधूक वाढली आहे.

शिवतारे यांनी बुधवारी सासवडमध्ये मेळावा घेत अपक्ष म्हणून निवडणूक लढवणार असल्याचे स्पष्ट केले. त्यामुळे बारामती लोकसभा मतदारसंघाची गणिते बदलणार आहेत. एकीकडे इंदापूरचे नेते हर्षवर्धन पाटील हे जाहीरपणे अजित पवार यांच्याविषयी नाराजी व्यक्त करत असताना आता शिवतारे यांनी तर थेट लोकसभा लढविण्याचीच घोषणा केल्याने निवडणूकीत नवीन ट्विस्ट निर्माण झाला आहे.

अजित पवार व विजय शिवतारे यांच्यात अनेकदा शाब्दीक चकमकी घडल्या आहेत. २०१९ च्या निवडणूकीत शिवतारे यांनी युतीचा धर्म म्हणून मावळमध्ये पार्थ पवार तर बारामतीत सुप्रिया सुळे यांच्या विरोधात जोरदार प्रचार केला. बारामतीत तर त्यांनी मोठी ताकद लावली. त्यामुळे अजित पवार कमालीचे खवळले. बारामतीत सुप्रिया सुळे यांच्या प्रचाराच्या सांगता सभेत थेट शरद पवार यांच्यापुढेच त्यांनी शिवतारे यांचे वाभाडे काढले. शिवाय तु कसा आमदार होतो तेच आता बघतो. मी एकदा ठरवले तर कोणाच्या बापाचे ऐकत नाही, हे अख्या राज्याला माहित आहे, असा सज्जड दम दिला. लोकसभा निवडणूकीनंतर लागलीच झालेल्या विधानसभा निवडीवेळी त्यांनी पुरंदरमध्ये संजय जगताप यांच्या पाठीशी राष्ट्रवादीची एकसंघ ताकद उभी करत शिवतारे यांचा पराभव घडवून आणला. या पराभवामुळे शिवतारे यांची राजकीय कारकीर्द मागे फेकली गेली.

२०१९ च्या त्या प्रकरणाचा बदला घेण्याच्या तयारीत आता शिवतारे आहेत. मुख्यमंत्री आणि दोन्ही उपमुख्यमंत्री त्यांची कशी समजूत घालतात, यावर बारामतीतील महायुतीच्या उमेदवारांची गणिते अवलंबून असतील. गत आठवड्यात बारामतीत शिवतारे यांनी विधानसभेचा शब्द दिला तरच लोकसभेचे काम करू, असे सांगितले होते. त्यामुळे शब्द घेतल्याशिवाय ते आता माघार घेणार नाहीत, अशी चिन्हे आहेत.